Entrante dialuna 8 partido ta busca 587 firma cada un pa participa na eleccion 2021

ORANJESTAD – Un total di 8 lider politico y nan partidonan politico entrante dialuna awor, lo ta ‘bringando’ pa acumula e 587 firmanan necesario pa nan por valida nan participacion oficial final den e proximo eleccion. Nan ta partidonan cu den e ultimo eleccion no a ricibi asiento. Ta trata di partidonan HTC, MAS, UPP, Pueblo Prome, PPA Transforma, CURPA, RAIZ y ACCION21. Entre dialuna awor 10 di mei cuminsando pa mainta 9am te cu 18 di mei 8’or y mei di anochi, excluyendo fin di siman, simpatisantenan por pasa y firma. Pero por firma solamente 1 biaha y mester usa sea cedula of paspoort pa vota. Noticiacla ta desea tur e 8 lidernan y nan partido tur clase di exito e siman aki. 

ENTREGA LISTA

Un total di 12 partido politico a entrega nan lista di candidato diabierna ultimo, y segun presidente di Conseho Electoral drs Glenn Thode, tur a cumpli cu e rekisito inicial, y ta nifica cu tur ta inscribi y pendiente e valides di 8 partido, nan lo por participa na e proximo eleccion. Un total di 4 partido (AVP, MEP, POR y RED) no mester di firma ya cu den e eleccion ultimo, nan a ricibi asiento y a forma parti di Parlamento di Aruba.