Hooyboer: A pidi SKOA aclaracion riba aumento drastico di schoolgeld

ORANJESTAD – Dentro di un siman, minister di enseñansa Michelle Hooyboer mester haya contesta di Stichting Katholiek Onderwijs Aruba (SKOA), riba e asunto di aumento drastico di ‘school geld’. Ta trata di un carta manda for di aña pasa november cu e peticion, pero cu ainda no tin contesta. E aumento ta uno cu ta di 75 florin pa 250 florin y cu tin cu wordo paga awor. E mandatario a sigura NoticiaCla.com awe merdia cu e no a sinta keto y cu bou di ningun circumstancia, muchanan lo (tin cu) keda perhudica cu e situacion di aumento. E ta admiti cu e ‘aanpak’ di SKOA no ta esun mas adecua. Mes momento e ta refuta e acusacion di oposicion cu gobierno no ta haciendo nada. De hecho, SKOA no ta maneha scolnan publico, y como tal nan por haci loke cu nan kier sin cu gobierno tin control riba esey. Esey no kier men si, cu SKOA lo por actua sin mas, Hooyboer a sigui splica. Riba e pregunta pakico e tabata keto riba e topico aki, e la sigura cu e la haci varios declaracion riba e tema aki caba. Mientrastanto SKOA a manda un carta di recordatorio recientemente (lesa e carta aki) pa corda mayornan riba e pagonan necesario. 

CARTA PA SKOA

E mandatario a sigui splica cu ta pasobra nan ta interesa den resolve e asunto aki, a dicidi di manda un carta aña pasa mesora ora cu SKOA a participa di e aumento drastico aki. E contesta no a yega bek, y e mandatario ta spera cu dentro di un siman, e por sinta na mesa cu e fundacion. E carta manda pa SKOA, ta pidi e fundacion pa splica pakico a dicidi pa haci e aumento aki den un solo biaha, y kico a conduci na e medida aki. A tende cu ta pa motibo cu SKOA tin un deficit cu e no por cubri, gastonan ta halto y asina por sigui. Pero oficialmente Hooyboer no a tende di e fundacion bek.

TUSSENWEG

Su pensamento e intencion ta pa percura pa yuda cu un ‘tussenweg’, unda cu tur hende por sali gana. E mandatario ta sugeri entre otro pa bin cu un aumento den fase, y evalua tur aña con pa aumenta esaki mas. P.e. un aumento di 75 pa 125 florin, y despues ta sigui wak. E subsidio enberdad ta menos, pero esey ta algo di hopi aña, y no ta basa cu no tin placa, sino pasobra e fundacion no ta presentando (mescos cu otro fundacionnan) nan cifranan annual. Aki por mira con cos ta y unda por sigui yuda. E mandatario a bay asina leu di bisa cu si resulta (analisando e cifranan) cu por haci algo eynan, lo por bay parlamento pa pidi un suma pa por yuda y evita cu e aumento pa mayornan mester ta asina drastico.

PROBLEMA CU SUBSIDIO

Pa loke ta e parti di subsidio, e mandatario a splica cu 10% di e suma subsidia, ta wordo retene pa gobierno na comienso di aña, ‘en espera di e jaarrekening’ pa compara kico a pasa. Como tal 90% so e fundacionnan ta haya. “Esey ta algo cu ta sosode pa añanan caba”. Aña pasa sinembargo cu e asunto di presupuesto atrasa, mirando e situacion, a dicidi cu ta retene 20% total. Esaki en espera di presupuesto su firmamento. “E 10% ey, mester wordo ‘verrekend’. Esey ta tumando lugar awo. Nada no a baha den e cantidad di subsidio cu nan ta ricibi. “Loke si nos mester bay haya un solucion pe, ta e 10% annual (cu ta keda retene). Unabes cu e situacion financiero di e scolnan (jaarrekeningen na tempo) keda resolvi, por sera acuerdo nobo pa cambia e subsidio total. “Te ainda e no ta na unda e mester ta”.

COMPARA CU OTRO FUNDACION

Interesante pa tende, ta cu mientras cu e suma cu SKOA ta pidi, ta un aumento drastico, ainda e ta mas barata cu otro fundacionnan escolar. E problema di SKOA ta cu nan no a aumenta esaki den 14 aña. Algo cu e otro fundacionnan si a haci. Pues de hecho, e problema no ta e suma final, sino cu e ta bin di un solo golpi, cu ta pone cu hopi no por paga esaki. Y como tal, mester bay wak kico por haci.

MUCHANAN PERHUDICA

E mandatario a splica NoticiaCla.com cu ningun mucha no por keda perhudica debi na e aumento aki. Gobierno su rol ta ‘limita’ ya cu mientras cu e ta duna subsidio, e no tin di bisa den e maneho di e fundacion. Algo cu mester wordo cambia. Ta resulta cu tin mucha actualmente di cual nan mayornan no por ni paga e 75 florin, corda e aumento drastico. E fundacion a sigura cu nan ta tene cuenta cu esnan cu no por pag’e, y ta duna un opcion di pago. Y si ainda no por, tin varios famia cu no ta paga y muchanan ainda ta bay scol. “Nos kier a wak schriftelijk kico e ora ey ta e plan di aanpak pa esnan cu no por afford, of cu no por caba pag’e, ki consecuencia esaki tin pa e famia”, Hooyboer a sigui bisa.

PETICION NOBO

“Mi ta convenci cu tin manera pa sali cu un solucion cu ta na bienestar di e famianan y di otro banda, e schoolbestuur” Hooyboer a sigui bisa. E discrepancia cu nan ta cobrando, compara cu e otronan no ta cuadra tampoco. E expectativa di e mandatario ta cu lo haya un contesta di SKOA, y cu tin espacio pa por combersa ariba. E hecho cu tempo a pasa, no kier men cu e mandatario ta poniendo presion. “Nos lo manda un peticion atrobe pa sinta na mesa. Mi tin tur confiansa cu mientrastanto, nan ta preparando un miho bista riba e parti financiero”.

OPOSICION

Oposicion ta hopi riba e tema aki, y e mandatario ta conciente di esaki. Segun e mandatario, e tema aki (mescos cu otro temanan) ta hopi interesante pa e oponentenan politico. “Bo ta papiando di cosnan cu ta hopi gevoelig den nos comunidad. Pero mi kier graag pa nan haci nan huiswerk prome cu nan papia con nan a yega na un situacion asina”. E mandatario a finalisa bisando den su combersacion cu NoticiaCla.com.