Mike Eman na entrega di lista: AVP ta kere den inocencia di Benny Sevinger

ORANJESTAD – Partido AVP a ubica Benny Sevinger na e posicion 29 como respet pa e proceso hudicial cu ta canando aunke cu e partido ta para tras di e candidato y ta kere firmemente den su inocencia. A bisa cu lo laga pueblo husga e situacion. Ta tene cuenta cu e estado di derecho tambe. Asina e lider di partido AVP Mike Eman a expresa diabierna na momento cu a entrega e lista di e partido berde formalmente. E lider a bisa cu tabata un lista dificil sigur cu e parti di Sevinger ya cu for di tempo cu na 2001 el a drenta politica y subi lista, e la haci esaki hunto cu Benny y semper nan tabata back to back. Ta prome biaha cu nan ta asina leu di otro. Pa loke ta e situacion di colega Sevinger, Eman a mustra cu e tin cierto duda den husticia ultimo añanan unda cu segun su persona, ta parse cu landsrecherche ta persigui solamente partido AVP y no partido MEP, cu segun Eman ta solamente enriquese su mes.