Trankilidad dilanti gabinete di gobernador

ORANJESTAD - Awe nochi premier Mike Eman y dos parlamentario ta drumi na cas bek, despues cu nan welga di hamber a termina merdia. Y e trankilidad ta bek dilanti gabinete di gobernador. Manera cu NoticiaCla a raporta for di merdia, e desicion di stop e welga di hamber a bin despues cu Eman a papia cu gobernador Refunjol, cu a informe cu dialuna proximo lo tin mas claridad riba e situacion di presupuesto. Esey no kier men cu e lo firma esaki, sino cu lo tin un indicacion unda e presuesto lo ta bayendo. E investigacion completo tin cu tuma su curso, pero por lo menos tin un indicacion kico e situacion ta. Mientrastanto NoticiaCla a compronde cu e comision di secretariado di CFT cu tabata na Aruba, a sea prepara of ta preparando pa bolbe Corsou pa asina traha nan rapport preliminar, y entrega esaki na Hulanda y gobernador di Aruba. Mike Eman,-segun su discurso merdia-, a cumpli cu su meta pa pone presion riba gobierno Hulandes, y logra cu a acelera e proceso di investigacion. Di otro banda, su compromiso di lo no para te ora cu gobernador firma e presupuesto, no a keda logra. Pa su simpatisantenan, nan ta contento cu loke nan a logra, mientras cu su contrincantenan ta sigura cu no a logra nada cu e welga ya cu CFT mes a investiga e presupuesto, y gobernador toch no a firma e presupuesto. Pa gobernador, importante tabata pa trece paz y trankilidad y esey a wordo logra, pa aworaki. Esnan cu tabata dilanti su despacho, a bandona e sitio y tin trankilidad atrobe dilanti y banda di e gabinete di gobernador. NoticiaCla tin un reportahe fotografico di e momento di bishita pa gobernador di premier Eman y e anuncio y momentonan despues.