Minister Cris Romero a keda for di lista di partido MEP!

ORANJESTAD – Loke hopi a specula den e ultimo 48 hora, a bira realidad. Actual minister Cris Romero a wordo laga for di e lista di partido MEP diahuebs anochi. Ora cu e lider di partido Evelyn Wever Croes a presenta e lista, su nomber (Cris Romero) no a aparece. Ora cu e lider a caba presenta e lista, e no a haci mencion mes di Romero, pero a gradici tur hende en general cu no a ‘make’ the list y a splica cu tabatin hopi cu mester a keda afo pasobra ta 29 so por ta riba lista. 

DISGUSTO

A compronde inoficialmente cu Romero lo a keda disgusta cu e number cu a ofrece, y no a aprecia e gesto. No ta conoci si ta el a nenga e posicion of si a lage afo pasobra e no a bay di acuerdo cu e number. Hecho ta cu un minister actual, cu tabata campañando te cu un dia prome, a keda afo, y pues lo no bolbe mas. A compronde cu partido lo no tabata mucho contento cu su prestacion durante e ultimo 3 aña y mei, y cu esey a pone cu mester a reevalua su posicion halto di 3 riba e lista anterior. Su entrada tabata mira pa e districto di San Nicolas, pero e hecho aki no a materialisa y a haya hopi critica pa nombracionan haci di su familiarnan den nv di gobierno, y e exceso di biahe durante su periodo como minister. No ta conoci kico lo pasa awor cu Romero, mirando e situacion cu a surgi.