Richard Arends: Lo mi no participa na eleccion venidero!

ORANJESTAD - Actual parlamentario pa partido AVP a confirma pa noticiacla cu e no ta participa na e proximo eleccion.  Esaki tabata su mensahe textualmente diahuebs anochi cu e la comparti cu e portal aki: 

" 12 aña pasa mi a inicia un caminda cu pa circumstancianan di e mundo politico a trecemi te aki: di consehero, pa minister y - despues di e tuma e paso di drenta politica activamente - pa miembro di Parlamento di Aruba.

E 12 ultimo añanan no a bay sin sacrificio, tanto personal como familiar. Mi a pone tur mi conocemento, capacidad y experiencia na disposicion di Pais Aruba. Mi ta convenci cu ma logra haci un diferencia y mi por wak atras cu hopi satisfaccion. Trahando semper di un manera integro y profesional. Na tur momento mi a keda hiba un politica limpi, na nivel y di contenido pasobra ta esey ta loke Aruba merece.

Aña 2020 tabata un aña di hopi reflexion, cu hopi ora den famia pensando con e bida lo ta ‘despues di pandemia’. No solamente pa Aruba, pero pa mi mes como persona y como profesional. Na momento cu e aña a bolter y nos a drenta e aña di eleccion, aspecto personal y profesional a bira hopi mas relevante.

Cu e mesun gana, motivacion y curiosidad cu mi a drenta e mundo politico, mi ta sali for di dje. P’esey mi a tuma e decision di no postula mi mes pa e eleccion venidero di dia 25 di juni y explora retonan nobo. Mi kier sigui desaroya mi mes profesionalmente sea den sector publico of priva.

Danki na mi casa, mi yunan, famia y amigonan y votadornan cu a sostenemi den e caminda aki y nos ta en espera di e capitulo nobo aki cu hopi entusiasmo.

Exito na esun nan cu ta na turno pa duna di nan banda. Dia 25 di juni, partido AVP ta bo unico opcion!"  Te aki su declaracion. Noticia den proceso. Keda pendiente pa mas info.