Booshi Wever: Ta strobando 'longarts' local di traha na Aruba

ORANJESTAD - Recientemente tin un yiu di tera a termina su specialisacion como longarts na Spaña. Segun ex minister di Salud Booshi Wever y actual lider di su propio partido politico UPP, e specialista Arubiano aki a labora na ImSan durante un tempo corto, despues di a termina su estudio di medicina basico na Colombia. Su ambicion y pasion sinembargo a hibé sigui un estudio mas avansa riba e tereno di pulmonologia na Spaña. Durante e periodo aki e yiu di tera aki a contrae matrimonio cu un otro hoben Arubiano y hunto nan a forma un famia, pero semper den nan mente a keda e proposito pa regresa nan tera natal pa asina contribui na yuda eleva e cuido medico.

E mayornan di ambos hoben Arubiano semper a para cla pa yuda nan yiunan logra nan meta, pero mester a constata cu e posibilidad pa nan yiunan bin establece nan mes na Aruba tabata wordo torpedea pa un propio colega medico cu a sigui e mes un specialisacion como longarts, y cu a escohe na 2013 pa bandona su carera como specialista voluntariamente y inicia un rumbo nobo como politico.

Segun Wever, e actual minister di salubridad ta bon na altura con e mes a wordo nenga na prome instancia e oportunidad di bin eherce su profesion como longarts na Aruba dor di e director medico anterior, esta sr. Boesten.

“Como minister es tempo ey encarga cu salubridad, mi a para e maneho descabeya y discriminatorio pa cu yiunan di tera di parti di e director medico aki, y mi a exigi pa tuma Sr. Schwengle den servicio. Esaki tambe a tuma lugar, y sr. Schwengle por a bin establece su mes na su isla natal” Wever a sigui bisa.

Segun Wever, por a spera un otro forma di proceder di e minister aki pa loke ta toca e solicitud di un colega specialista Arubiano pa bin establece su mes na Aruba. Principalmente si nos tene na cuenta cu e mes, tempo cu e tabata traha ainda como longarts, a laga sa cu malesanan di pulmon a aumenta na Aruba y cu expansion di e cantidad di longarts no tabata un luho. Na di dos lugar su mes un gobierno a declara di kier a crea un hospital y cuido di 5 strea pa e pueblo di Aruba, y finalmente a haña e bendicion di parlamento di Aruba pa cuminsa cobra 1% di healthtax cu e fin pa mehora e cuido medico na Aruba. “ Sin misericordia sinembargo e minister a dicidi di no duna e dokter specialista arubiano aki e oportunidad cu e sí a wordo brinda, y a nenga su solicitud”.