RIVM: Aruba awor tin e cantidad mas halto di contagio nobo di Covid den Caribe Hulandes

AMSTERDAM /ORANJESTAD – Relaciona cu e otro islanan di Caribe Hulandes, Aruba tin e cantidad di raportahe mas halto di contagio di Covid19 segun cifranan di siman pasa. Asina e rapport di Rijks Instituut Volksgezondheid & Milieu a informa den nan rapport semanal di e siman aki.  Nan ta basa nan mes riba informacion suministra di Aruba mes, unda cu segun e raportahe, siman pasa 98 persona per 100 mil habitante a test positivo. Compara cu e otro islanan, esaki ta pone Aruba como esun mas halto.

OTRO ISLANAN

Na Bonaire e situacion ta menos unda cu tin 28 persona pa 100 mil habitante cu e test positivo siman pasa, Corsou tabatin 48 per 100 mil habitante positivo, St Maarten 36 per 100 mil habitante, Saba apenas 1, y Statia no tabatin ningun caso desde 28 di januari ultimo.   

VACUNA

Pa loke ta vacuna, SABA tin 91.5% di nan poblacion adulto cu tin por lo menos 1 vacuna, cu ta esun mas halto entre e islanan. Aruba tabatin te cu dia 2 di mei, 54.8% di poblacion adulto cu por lo menos 1 vacuna. Bonaire tabatin  71.1% di e poblacion adulto cu por lo menos 1 vacuna. Corsou tabatin 59.5% di nan poblacion adulto cu por lo menos 1 vacuna. St Maarten tabatin  25% di poblacion cu por lo menos 1 vacuna, y Statia tin 42.6% di nan poblacion adulto cu por lo menos 1 vacuna.