Strandpolitie y Unidad K-9 a tene control banda di laman

ORANJESTAD - Strandpolitie y Unidad K-9 a tene control banda di laman recientemente. Despues di un accion e siman aki na Palm Beach, cu tabatin como resultado detencion di un persona pa posesion di un cantidad considerabel di droga, Strandpolitie ta planiando mas accion pa cua nan ta conta cu asistencia di e ekipo special di cachonan K-9. E resultado ta demostra un necesidad pa mas di e tipo di control nan asina, riba un base regular!

Zoraida de Cuba, Chef van Dienst na Strandpolitie a splica cu nan a pidi asistencia di nan coleganan cu ta traha cu cachonan specialisa den detecta droga y e accion cu nan a tene tabata hopi exitoso. Hecho ta cu Strandpolitie ta sali regularmente cu un grupo grandi y controla den areanan na beach unda tin indicacion di bendemento di droga y no ta facil pa haya e droga riba e persona, pasobra nan ta scond’e.“Nos ta haci nos best”, pero despues di un cantidad di accion, Polis no tabata haya e resultadonan desea. E beachnan y siguridad ta dos di e elementonan principal cu Aruba ta uza pa logra atrae mas turista na nos isla. Esaki ta dos punto positivo cu a pone Aruba riba mapa pa e industria aki cu awendia ta e pilar principal di nos economia. Tur hende ta contribui cu nan “granito de arena” pa mantene nos beachnan limpi y sigur, pues Polis tambe. De Cuba a splica cu Strandpolitie ta patruya na pia y riba ATV (all terrain vehicle) riba beach. Nan ta check semper ken ta e personanan cu ta frecuenta cada bes e mesun camindanan y nan ta atento pa sospechosonan pa bendemento di droga cu a wordo describi pa personanan cu a yama Polis.

Den hopi caso ta nota e sospechosonan di bende droga, sinta banda di companianan di watersports. Tin biaha ta nan ta acerca turistanan y frecuentemente tambe ta e turistanan ta acerca personanan cu nan ta identifica como bendedo. Den e caso di e detencion di e siman aki tabata trata di un persona cu tabatin droga scondi cu e cacho di K-9 a haya y e persona a admiti cu e droga ta di dje.