Decision pa ‘ciudadanonan no cobra pa remedi mas’ a confronta reto legal

ORANJESTAD – E decision recien di gobierno pa hala e decision bek di AZV cu e ciudadano mes mester paga pa remedi, a confronta confusion y tambe tardansa den su ehecucion pa motibonan legal. Confusion di parti di proveedornan di servicio di salud mas bien. AZV mes ,- segun su director Edwin Jacobs a splica noticiacla -, a keda informa delanta door di gobierno pero ta ora cu a informa minister di e proceso, a informa e proveedoornan via un email ,- cu noticiacla tin den su poder -,  cu e cambio ta mas complica den practica pa ehecuta mesora, esta for di 1 di mei caba. Asina mes, algun botica a honra e decision mesora, cu e risico cu nan no ta haya esaki paga, mientras cu otronan a mustra nan confusion. For di e director di AZV  , noticiacla a compronde cu pa fin di siman aki mas sigur e cambionan legal ta cla pa por cumpli cu e decision ‘nobo’ di gobierno, y cu e lo ta ‘cu forza retroactivo te cu 1 di mei ultimo’. 

E CAMBIO

Manera nos a raporta caba, mientras cu prome minister a informa diabierna anochi (30 di April 2021) publicamente cu ‘ entrante 1 di mei 2021 no mester paga pa remedi mas’, esaki sinembargo no a keda informa mesora na esnan envolvi e.o. boticanan\. Segun un email di AZV poder, por mira cu AZV ta informa e provedoornan di servicio di salud (te) riba 3 di mei cu minister encarga cu salud Dangui Oduber a informa AZV di e cambio anuncia caba for di e diabierna prome.  Pues a anuncia algo publicamente dia 30 di April pa drenta na vigor 1 di mei, pero cu e proveedornan mes a haya e informacion di forma ‘oficial’ te dia 3 di mei (2021). 

SPLICACION DI AZV NA PROVEEDORNAN

AZV den e email ta mustra cu debi cu e trayecto legal pa cambia e lista positivo di remedi a cana su caminda normal ( y a keda formalisa), nan (AZV:red) ta mara na e ehecucion di esaki y como tal e lista positivo no ta existi mas. “Pa coregi e adaptacion aki ta un asunto compleho y lo tuma su debido tempo” e email ta sigui bisa. Mientrastanto for di e director di AZV, noticiacla a compronde cu nan ta den e proceso pa keda cla cu e peticion aki. “Nos ta bezig cu esey” sr Jacobs a sigura e portal aki. “Entre decision y realisacion tin un proceso. No ta algo inusual. Conseho di Minister ta tuma un decision, y tin cu formalisa esaki den e ley” Jacobs a sigui bisa. E ta premira cu pa fin di siman e asunto ta regla legalmente. Mientrastanto segun Jacobs, un carta di ayera pa e provedoornan di servicio, a clarifica cualkier inquietud cu por tabatin.