Respaldo: A pidi gobierno pa inverti den ayudo durante crisis di Covid19 pero no a haye

ORANJESTAD - Desde comienso di e crisis Respaldo a bati alarma cu mester inverti mas den e cuido di salud mental. Mester hopi mas capacidad di tratamento. Specialmente den tempo dificil pa e economia tin mas preshon riba comunidad, mas stress, mas sufrimento, mas anciedad. Lamentabelmente e inversion aki no a sosode,  sufrimento a crece mas y lista di espera tambe, manera nos a indica algun siman pasa den nan rueda di prensa. Den Reino, Aruba ta hopi atras den cantidad di persona cu por traha pa e cuido di salud mental y tambe den e cantidad cu ta wordo inverti den e cuido aki compara cu Corsow, Islanan BES y Hulanda. AZV no tin e espacio den su presupuesto pa por duna e servicio di cuido necesario aki. Pa e motivo aki a puntra algun siman pasa  Gobierno pa entrega un peticion na Reino pa sosten pa asina nos por yuda e cantidad adicional di personanan cu tin mester di sosten a consecuencia di e crisis di Covid, di mesun manera cu hospitaal a ricibi extra capacidad di cuido intensivo pa yuda pashentenan di Covid. Ta spera cu pronto algo lo wordo haci cu e peticion pa ayudo.  

Na e momento aki tin sigur 7000 Arubiano cu ainda no ta haya e cuido cu nan mester di dje. Nos ta kere cu nos por yuda por lo menos mitar di e grupo aki si nos ricibi algun adicion relativamente simpel, riba locual nos ta haciendo caba. Solamente door di brinda e cuido necesario pa salud mental na e comunidad di Aruba tragedianan manera esun di awe lo por wordo preveni y e chens cu famianan pa resto di nan bida mester sinti falta door di e perdida di un yui, ruman, tata, mama of otro ser keri lo ta hopi menos. 

7000 Arubiano cu tin derecho riba e cuido di salud mental no ta ricibi esaki. E lista di espera di Respaldo ta largo y ta bay sigur te cu un aña. UO AZV no a presupuesta e ayudo pa e grupo aki. Respaldo a puntra Minister pa entrega un peticion na Reino pa ayudo. Door di no corta den e cuido di salud mental nos por evita mas cu ta posibel tragedianan similar na esun di awe di sigui sosode.

Pa mas informacion referente cuido di salud mental na Aruba y Respaldo por acudi na nan pagina di Facebook.