Caso di intento di rescate lamentablemente a haya final tragico

EAGLE BEACH – Loke a inicia como un intento di rescate di un persona di un piso di hotel, lamentablemente a haya un fin tragico. Awe mainta Aruba a keda conmovi pa un noticia tragico ora cu un hoben trahado di un hotel na Aruba no a logra keda convenci pa autoridad pa rescate di e piso cu e tabata, y a tuma su propio bida. Normalmente no ta usual cu prensa ta cubri casonan asina, pero den e caso aki, esaki tabata inicialmente un caso di intento di rescate cu no a logra su meta. 

DEPRESION

Tabata awe mainta cu autoridad a mobilisa cu urgencia pa e hotel Phoenix, pa un caso di un trahado cu a cera su mes den un camber di hotel. A manda unidadnan mesora pa papia cu e trahado y pa logra convence pa sali di e camber. Pero esaki no a resulta y e hoben tabata determina pa tuma su paso. Despues di varios intento envano, e hoben a tuma e paso drastico cu e resultado conoci. Na final, autoridad a purba di salba bida di e persona, pero segun vocero di polis Lito Lacle, 10:55 dokter Texier a constata morto di e hoben Jhon Semeleer. A compronde cu por lo menos 48 trahado di e hotel lo ta den trauma tambe varios agente policial cu tabata testigo di e suceso. Noticiacla ta manda palabra di condolencia na famia di e fayecido.