KPA: Polis mester a actua 28 biaha contra partidonan politico den weekend

ORANJESTAD - Cuerpo Policial durante weekend a atende cu en total di 28 asistencia cu tawatin di haber cu campaña politico. E relato policial no ta haci mencion di cua partidonan esaki ta pero ta conoci cu e dos partidonan mas grandi MEP y AVP tabata hopi visible den fin di siman cu reparticion di sticker y tambe bandera. Y ta aki ta unda cu varios biaha polis mester a actua debi cu e partidonan no tabata cumpli cu e palabracion haci cu polis. 

COMISION

Manera ta conoci, for di algun siman caba Cuerpo Policial a asigna un comision pa atende tur problematica  entorno eleccion 2021. Na comienso a organisa un reunion pa asina sera conoci cu tur e personanan di contacto di tur partido politico y despues a reuni cu cada partido político individual caminda a papia cu nan over e Decreto Ministerial y ki strategia nan lo a bay usa pa cu nan campaña.  A cumbini cu tur partido cu Cuerpo Policial tur tin un solo meta en comun y esey ta pa preveni e contagio y plamamento di COVID-19 y cu esey den mente nan mester tene na cuenta cu Samenscholing, mantene distancia Social y e uso di tapaboca. Dus cu otro palabra 2 hende junto, distancia di 1,5 meter for di otro y preferibel no ta drenta cas y ta keda pafo scucha e personanan cu ta biba na e cas. 

POLITICONAN NO A TENE NA REGLA

Di e 28 asistencia cu Cuerpo Policial cu bay relaciona cu campaña politico por a constata cu varios partido politico no a tene nan mes na e palabracionnan hasi y a atende nan ariba esaki. Cuerpo Policial a pone enfasis cu nos tin un Decreto Ministerial cu nos mester atene nos mes na dje y durante nos encuentro semanal nos lo repasa y evalua junto cu tur partido politico.