Partido politico UPP ta lansa su lider nobo diaranson awor

ORANJESTAD – Partido politico Union Patriotico Progresista (UPP) ta lansa nan lider politico nobo e siman aki. Asina noticiacla a compronde di personanan cerca di e proceso.  Mientrastanto ex lider y fundador di e partido Booshi Wever mes a pone riba su pagina di Facebook, cu e partido ta cla pa haci e anuncio aki e siman entrante, y hunto cune, un lista di candidato nobo y un direccion nobo. E fuentenan cu a confia e portal aki, a sigura cu e anuncio ta bin diaranson awor 5 di mei, pa coincide cu ‘dia di liberacion’, como un forma simbolico. E fecha ey UPP lo lansa su lider nobo cu a compronde di ta un persona femenino. Cu e hecho cu e partido ta cambia di lider, no ta nifica cu e pronto ex lider Booshi Wever lo retira, sino lo haya un otro puesto riba e lista. 

CAMBIO DI LIDER

Cu e cambio aki, partido UPP ta bira e di cuater partido cu ta bay e eleccion aki cu un lider nobo, compara cu e eleccion di 2017. E prome tabata partido POR cu a cambia su lider di Otmar Oduber pa Alan Howell, sigui pa PPA cu ta cambia Benny Nisbet (dfm) pa Lisette Malmberg, partido MAS cu ta cambia Holmo Henriquez pa Marisol Lopez Tromp, y awor partido UPP cu ta cambia Booshi Wever pa un otro persona cu lo keda anuncia diaranson awor.