Hoben basebolista cu scholarship deportivo na College na Merca

ORANJESTAD –E hoben Dijendrick Croes a caba di firma cu e programa respeta di baseball di Broward Community College. Dijendrick a ricibi un full scholarship y lo forma parti di e lineup di Seahawk pa e siguiente dos aña. Di e manera aki e lo haña e oportunidad pa desaroya su talento di baseball na un nivel hopi mas halto, habriendo porta pa e posibilidad di un carera deportivo y alaves haña su estudio completamente paga. Dijendrick a wordo gescouted durante e prome University Sports Showcase Aruba cu a tuma lugar september 2014, na unda nos hoben basebolista nan a haña e oportunidad pa demostra nan abilidad y dedicacion pa e deporte di baseball.

Den e serie di University Sports Showcase nan aki e hobennan ta participa den try-outs cu coach y representante di diferente Universidad di Merca. E prome evento cu a tuma lugar na september tabata tin como enfoke solamente e deporte di Baseball, pero e aña aki, lo duna oportunidad na otro disiplina di deporte. E siguiente University Sports Showcase lo tuma lugar fin di maart y cu enfoke riba e deporte di futbol.