Willink: Mayoria partido dispuesto pa forma gobierno cu Mark Rutte

DEN HAAG – Aunke esey no ta e punto mas importante awor, mayoria partido politico Hulandes ta dispuesto pa traha cu actual premier demisionario Mark Rutte. Asina informador Tjeenk WIllink a bisa diabierna den su relato como informador na Tweede Kamer. Contrario cu cerca nos, na Hulanda ta Tweede Kamer ta atende cu e formacion di gobierno enbez di Rey, manera cu tabata sosode antes. Cu e raportahe aki, e trabou di e informador ta cla y pa 12 di mei, ta premira cu lo nombra un formador cu tin cu sondea e posibilidadnan pa forma un gabinete nobo despues cu Hulanda a bay eleccion dia 17 di maart ultimo. 

TRAHA HUNTO

Segun Willink, ta mas importante awor pa resolve problemanan grandi a consecuencia di e pandemia. Mas ainda cu ken kier traha cu ken. Mester bin un acuerdo di coalicion riba e puntonan principal. E ora esey tin cu wordo comberti den un programa di gobernacion. E pregunta ta kico e temanan principal ta y con mester soluciona esaki. Despues den e siguiente fase, ta bin e parti di ken kier traha cu otro. Aunke esey ta bin despues, Willink a bisa si cu el a inventarisa ken si kier y ken no kier traha cu otro. Hopi partido ta exclui trahamento cu prtido PVV y FvD. Pero pa VVD di Mark Rutte tin mas espacio. Solamente PVV, SP y Bij1 no kier traha cu Rutte. PvdD, Denk y BBB ta considera un aliansa cu Mark Rutte, como no confiabel. Otro partidonan si ta tene e ‘porta habri’ pa goberna cu ne.