Partidonan politico nobo mester 587 firma pa logra participa na eleccion proximo

ORANJESTAD – E aña aki, debi na e pandemia cu tin, lo tin varios cambio pa cu e eleccion Parlamentario 2021. Por lo menos, si Parlamento logra cambia e ley di  votamento pa legalisa tur e cambionan proponi. Presidente di Conseho Electoral Glenn Thode e siman aki a splica varios proceso cu ta cambia, di cual esun mas grandi ta e parti di control di carchi di voto y e parti unda cu lo scan e voto electronicamente pa haya un bista delanta di e resultado. Fuera di e parti electronico, tin algun cambio mas segun Thode. 

CAMBIONAN

Entre e cambionan tin esun ora cu un votador bin cu su carchi di voto, unda cu esaki lo wordo gescanned, y registra, envez di ta lesa esaki duro y haci tur sorto di pregunta pa hende tende den e sala. E persona e ora ta haya su biljet pa vota, cu na final di voto, e votador ta pasa den un otro scanner pa esaki registra e voto cu despues ta keda deposita pa e machine mes. Tur esaki ta den bista di e medidanan contra e pandemia, cu mester percura pa menos ‘intercambio’ di hende, man y otro manera cu por traspasa e virus actual. Ademas a percura pa aumenta e cantidad di stembureau cu 8, pa un total di 70 y dos centro adicional, esta A y B cu normalmente ta hospital y tambe prizon. E intencion ta pa ora cu e stembureaunan cera anochi, mesora ta anuncia e resultado preliminar via e resultado di scan haci anteriormente. E ora e conteo manual ta continua regularmente. 

PARTIDONAN 

Prome cu por tin eleccion, mester tin partidonan politico cu tin cu legitima nan participacion. Aki tambe tin un diferencia. Si antes e evento aki tabata sosode na un solo lugar, esaki awor ta bira 3 diferente lugar. Y e forma pa registra e firma pa e partido, tambe ta cambia. Ta premira cu mester reparti 4000 firma entre e partidonan ‘nobo’, unda cu ta pidiendo 587 firma pa partido, pa e por participa legalmente na e eleccion. Ta akinan ta bira conoci cuanto partido finalmente lo por participa na e eleccion di dia 25 di juni. E firmament ta cuminsa entrante 10 di mei proximo. E problema ta cu si tin mas cu 11 partido participando na e eleccion, e sistema nobo di scan, lo no por funciona y tin cu resort ana e sistema ‘bieu’ di registra voto. Esaki e presidente di e ER, sr Thode a splica e siman aki un biaha mas. E tin tur confiansa cu tur cos lo cana bon y cu e sistema ta uno legitimo y confiabel y cu e eleccion lo ta uno corecto y sin problema.