Varios partido politico chikito buscando aliansa cu otro partido

ORANJESTAD – Varios partidonan politico considera como ‘chikito’, ta buscando aliansa cu otro partidonan chikito, pa asina drenta eleccion proximo como un bloke mas fuerte. Noticiacla a compronde cu por lo menos 4 partido a y ta hacienda e intento aki, cu ta entre otro partido Red Democratico, PPA Transforma ,ACCION21 y Partido Pueblo Prome. 

PAKICO ALIANSA

E intencion di e partidonan pa busca aliansa, ta pa asina nan ta mas fuerte como un bloke, envez di ta riba nan mes. Ta conoci cu den pasado, partidonan chikito nan chens no sa ta hopi grandi pa logra haci un impacto necesario pa por trece e cambio desea segun e partido. Si un partido haya un of dos asiento mes, esaki (manera a mustra recientemente), no ta suficiente pa garantisa cambio. A lo menos cu e partido usa su posicion strategicamente y bira asina e ‘yabi’, unda cu por pone un partido grandi cu lomba contra muraya, sino ta ‘benta e gobierno abou’. Esey no a sosode e biaha aki,  y e partido cu a ‘benta gobierno abou’, tabata ironicamente e partido grandi. 

RESTZETELS

Un motibo cu por lo menos un partido nobo chikito a usa, ta cu nan kier evita cu debi na e sistema actual di reparticion di asiento, cu por surgi (manera cu a surgi na Corsou recientemente) cu e falta di haya suficiente voto pa asiento cerca e cantidad grandi di partido chikito, a pone cu e votonan aki a bay den restzetel pa e partidonan grandi. Osea partido chikito nan inabelidad di logra asiento y suficiente voto, ta beneficia partidonan grandi. Y esaki ta netamente loke por lo menos un of dos di e partidonan chikito nobo, kier evita. 

PASADO

Un di e partidonan politico cu a busca aliansa cu un otro tabata UPP cu a uni cu PPA pa eleccion di 2017.  Pero esaki no a genera suficiente voto pa un asiento. De hecho, e cantidad di voto no a yega ni mil, cu a pone cu den e caso aki, ambos partido a keda afo y e union no a resulta. Te awor, UPP ta pensa di bay su so, mientras cu PPA awor tin un lider nobo y un imagen nobo y ta cla pa uni cu otro partidonan pa wak si nan por asina bira mas fuerte.