E luna aki Aruba ta dicidi riba asunto di visa pa colombianonan

ORANJESTAD – Minister encarga cu asunto di estranheria, Benny Sevinger no ta na altura, cu Hulanda a pone un ultimatum pa Aruba dicidi riba asunto di visa colombiano. “Ami no a haya e peticion eynan” Sevinger a sigura NoticiaCla.com dialuna mainta. “Por ta e la drenta via minister president”. Loke si e mandatario confirma, ta cu dentro di poco, e luna aki mes, conseho di minister tin cu tuma un decision riba e asunto aki. Ta trata di e decision si Aruba ta mantene e visa pa colombianonan drenta Aruba of no. E mandatario a bisa cu pa fin di februari e decision lo mester ta tuma caba. Hulanda lo a bisa Aruba cu e tin te fin di e luna aki pa tuma su decision.

SITUACION DI VISA

For di basta aña (2001) tin e visa implementa pa colombianonan cu kier drenta Aruba. Ta trata di un lista di 105 pais cu ta obliga pa pidi visa. For di e tempo ey presidente colombiano Uribe a protesta contra esaki, pero no a logra. Union Europeo a vota riba si Colombia mester keda riba e lista, y a dicidi finalmente contra esaki. Pues ta kita e restriccion di visa, of ta suavisa esaki estilo un ‘waiver visa’ pa biaha.

NO A DICIDI AINDA

Aruba, Corsou y St Maarten tambe mester a tuma nan decision. Corsou y St Maarten a tuma decision cu ta kita esaki, pero Aruba no. “Nos ta discutiendo (e asunto) ainda den ki forma Aruba lo bay na esaki” Sevinger a bisa. E decision cu Aruba tin cu tuma ta si ta elimina e visa of ta suavisa e rekisito pa drenta Aruba. “E discusion ey no a caba ainda. E ta riba agenda di minister raad” e mandatario a bisa. NoticiaCla.com a compronde di e mandatario, cu tur conseho a drenta. Y tin consehonan cu ta pro e visa y algun cu ta contra. Ta keda na conseho di minister di Aruba ki rumbo nan ta bay cu e asunto aki awo.