Richard Arends: E rapport (forensico) ta conclui cu ami no a hasi nada ilicito ni ilegal

ORANJESTAD – Un di e personanan cu a haya hopi atencion den e rapport forensico riba Refineria di Aruba (RdA), ta e actual parlamentario Richard Arends. E atencion tabata riba e hecho cu e actual parlamentario como un figura publico, e tempo ey asabiendas di e situacion di Aruba, lo kier a ‘enrikese su mes’ cu un contracto hopi lucrativo, siendo cu Aruba no tabata den su miho momento. E rapport ta expone mayoria detaye di e contracto y e relacion di trabou cu Arends y RdA. Arends den su prome reaccion pa noticiacla ta refuta cualkier iregularidad y illegalidad cu e por a haci. 

CONTRACTO

Mientras cu e rapport ta ilustra detayenan di e contracto tan comenta entre Arends y RdA, loke a hala atencion y e critica cu Arends a ricibi na su direccion pa cu e contract, ta e.o. e clausula cu ta stipula cu si cancela e contracto prome cu tempo, cu mester paga e persona (Arends:red) e suma restante, cu lo ta den miyones. Pero, e rapport ta mustra mesora si tambe,- cu contrario na loke ta wordo bisa pa contrincantenan politico -, cu mientras cu e contracto en berdad a wordo firma, tin prueba cu niun dia Arends a traha den e funcion menciona, y cu tampoco el a ricibi salario pa e añanan pa cual lo ta tild’e di lo por (a) haya placa, specificamente entre 2016 y 2018. Pasobra a compronde cu contrincantenan politico ta tilda Arends, di cu mientras cu e tabata labora den gobierno, e tabata wordo paga tambe pa RdA. 

REACCION ARENDS

Den e rapport forensico tambe a inclui e reaccion di Arends riba e tema aki, unda cu Arends ta sigura cu e contract nunca no a keda ehecuta, ni cu su funcion a wordo inscribi na Camara di Comercio. “Nunca mi a considera mi mes den servicio di RdA, ni a ricibi salario y/of prueba di salario, y tampoco a disfruta di beneficionan primario ni secundario. De hecho, despues di a cera e acuerdo, mi a distancia di e funcion, su derechonan y condicion cu ta stipula den e acuerdo, den pasado, presente y futuro”. Arends a contesta esnan cu a traha e rapport. 

PAGO PA CUENTA PRIVA

Ora cu esnan cu a traha e rapport a atende cu Arends riba e asunto cu a pague riba su cuenta priva envez e cuenta di compania pa trabounan cu su compania di consultancy a haci pa RdA, a puntre tambe pakico a haci esaki. “Ta trata un peticion di e compania pa haci e pago di november 2016 na e director”.  Mas claridad no a wordo duna e momento ey.   

REACCION ARENDS

Noticiacla aki a confronta Arends pa su reaccion riba e contenido di e rapport forensico. “ Esfuersonan persistente pa atacha mi integridad a fracasa” Arends a cuminsa na bisa. “ E rapport ta conclui cu ami no a hasi nada ilicito ni ilegal y tur cos a sosode regun regla, procedura y responsabilisacion. Ademas, e rapport su conclusionan ta refuta tur e ponencianan di prome minister (Evelyn Wever Croes:red)  pa cu mi persona tambe” Arends a sigui bisa. Por lesa e rapport completo AKI.