Vacunathon a vacuna 7101 persona contra Covid19 den weekend

ORANJESTAD – E prome (di porta mas cu lo por sigui) Vacunathon contra Covid19 a produci 7101 hende vacuna cu nan prome shot contra e malesa. Mientras cu no a logra e cifra di 10 mil cu tabata e meta, hopi ta bisa cu mester considera esaki como un logro, si mira e resistencia cu (taba)tin contra e vacuna aki. Hopi a spera hopi menos, mientras cu otronan tabatin e speransa cu lo a supera 10 mil bay leu. Awor esnan cu a prepara e vacunathon mester analisa kico ta e factor cu ta pone cu ainda tin un grupo basta grandi cu toch no ta sinti e necesidad di vacuna, y convence e grupo aki pa ainda vacuna. Y di otro banda, por elogia e operacion hinca den otro di e 200 y pico persona cu a traha e fin di siman aki pa logra e vacunathon.

E OPERACION

E prome dia a spera di por a haya maske ta mitar di e cantidad total di 10 mil, esta 5 mil pero esaki no tabata e caso. A logra 3200 y pico hende cu a vacuna, di cual segun minister di salud Dangui Oduber, 90% tabata di hendenan cu no tabata registra. A nota tambe cu e prome dia e grupo mas grandi a bin den oranan di mainta y cu despues di merdia e cantidad a baha considerablemente. A considera e ora pa adapta e orario pa diadomingo, unda cu tabata evalua pa tuma un ‘break’ entre 12’or di merdia y 2’or y despues rek e atardi te 6’or envez di 4or. Esey no a sosode, y pa 4or tabatin 7001 persona vacuna. A sigui toch te cu 5’or y e ora e total a aumenta cu 100 mas pa un total di 7101. 

LOGISTICA

E logistica tabata uno cu a cana bon, unda cu 4 localidad strategicamente ubica tabata opera for di mainta trempan y di tal forma cu tanto esnan cu tabatin cita, por a yega y esnan cu no tabatin cita, no tabata strobe otro. Un fluho continuo di hende tabatin unda cu p.e. na San Nicolas, e centro Teresita a conoce un asistencia record di hende, compara cu e prome 10 siman di operacion di vacunacion. Hopi tabata e complimentnan di esnan cu a vacuna, y a sugeri pa no lague na un solo oportunidad, pero pa crea mas vacunathon pa mas hende por yega na haci esaki. E mandatario di salud a bisa e portal aki cu e intencion ta pa evalua despues si ta sigui cu mas vacunathon. Mirando e resultado, no ta descarta cu cierto adaptacion, mester por presenta un vacunathon mas pa logra aun mas hende vacuna. Mester corda cu awor tin 7 mil hende mas cu awor tin nan prome vacuna, y cu no tabata registra y cu aki tres pa 5 siman mester haya nan di dos vacuna. Pa nan, a compronde cu a regla automaticamente un cita cu ta reparti den entre 3 pa 5 siman di tempo. Pues no tur hende lo haya e mesun fecha di 3 siman (manera a sosode anteriormente) pa vacuna.

POLITISA E EVENTO DI VACUNA

Entre e problemanan cu por a tende, ta e parti politico unda cu tabata bisa cu mientras cu ta compronde e entusiasmo di e mandatario en cuestion unda cu e ta presente na tur e 4 sitionan, e ta crea un tinte politico ‘inconcientemente’. Esaki pasobra esnan cu no kier ta ligan a e partido cu Oduber ta miembro di dje, no kier ta parti di e potretnan cu ta wordo saca ora cu e mandatario aparece. Ademas e hecho cu e mandatario mes dado momento a sinta tras di computer pa asisti e pueblo, a wordo mira cu diferente wowo. Mientras cu e gesto ta aprecia cu e mandatario mes ta activo y no ta djis dirigi di banda, ta mire como un stunt di campaña. Y varios post riba FB a mustra cu e mandatario ‘ta traha y no ta sinta na banda’ etc. Fuera di e mandatario en cuestion, bishitanan di otro mandatario tambe tabata haya critica pa a ‘politisa’ e evento aki.