Segun rapport forensico, tabatin un ‘free for all’ den Rda pa 2 aña

ORANJESTAD – Refineria di Aruba (RdA) a gasta hopi placa, sin cu esaki a keda registra, y a usa servicio di multiple compania consultant y paga nan sumanan cuantioso sin cu por a registra of comproba nan servicio presta y of contract cu e companianan aki tabatin firma cu RdA. Esaki ta apenas un di e puntonan cu ta resalta den e rapport forensico extenso recientemente entrega na gobierno di Aruba y Parlamento. Den fin di siman aki noticiacla.com a ricibi un copia di e rapport, y lo repasa cierto aspecto di e rapport di 168 pagina den e relato aki. E reaccion inicial di prome minister di Aruba Evelyn Wever pa cu e rapport aki, ta cu e contenido inicial a ‘bira su stoma’ y ta considera e loke el a lesa, increibel. 

MAL MANEHO

E rapport final forensico di Forensic Services Caribbean riba maneho di  RdA cu a keda cla na mitar di 2020 caba, a conoce su parti final e aña aki y a keda entrega na gobierno y despues Parlamento recientemente. E contenido di e rapport ta tipifica e compania RdA di mal maneho general cubriendo e periodo di 2016 te 2018. Specificamente mal uso di fondo y maneho general bruha ta loke ta resalta, segun e rapport. Mientras cu e rapport ta trata hopi persona y compania, esnan cu ta resalta debi na e publicidad rond di dje (y cu pa e relato aki e portal a enfoca ariba), ta riba e ex director Alvin Koolman y e actual parlamentario Richard Arends. E ultimo aki pa su compania di conseho cu a haci trabou pa RdA y su nombracion despues como   (futuro) director financiero di e compania. 

KOOLMAN

Manera indica, como e persona principal na cabez di e operacion, Alvin Koolman, e portal aki a enfoca entre otro riba e persona aki. Pa resumi e puntonan principal, e raport ta conclui cu como manehador di tanto RdA y FMSA, Koolman tabata haci palabracion y contracta varios consultants, pero mayoria di e facturanan no tabata specifica e cantidad di ora traha, ni tabata presenta un rapport di trabou cada cuartal y tampoco contractonan firma. E rapport a papia di basicamente un ‘free for all’ di trabou consultorio, cu no obstante falta di splicacion, tabata wordo paga asina mes pa e director. Segun e rapport, Koolman su contestacion tabata cu ‘no tabata wak e necesidad pa raporta riba e trabounan haci , ni cu mester a registra e cantidad di oranan cu a traha’. Tambe no tabatin contractonan cera, pues no tabatin prueba di compromiso di trabou. 

HORIZON CONSULTANCY GROUPUn di e companianan menciona y cu a haya hopi atencion publico debi cu su awor ex director di dicho compania Horizon Consultancy Group, ta actual parlamentario Richard Arends. Un di e puntonan cu ta resalta ta cu ,- segun e rapport -,  RdA a haci pago pa trabou cu e compania lo a haci, pero cu e pago no a bay riba e cuenta di e compania sino di e cuenta personal di e ex director, esta Arends). Ta trata di ‘solamente’ un luna pero cu tabata suficiente pa resalta den e rapport y cu a crea speculacion di practica dubioso,  

CONTRACT DI DIRECTOR FINANCIERO RDA

E contract di trabou di Arends como director financiero di RdA tambe a haya hopi atencion den publicidad. Esaki no obstante cu segun Arends a sigura esnan cu a conduci e rapport, cu nunca el a eherce e funcion den practica ni a ricibi placa pa esaki.  Den e rapport, detayenan no antes conoci di e contracto ofreci y firma pa tanto RdA y Arens, ta bira conoci. Puntonan manera e suma di e contracto, e detayes di e condicion di trabou y tur beneficio. Loke ta resalta tambe segun e rapport, ta e falta di conocemento di ex director Koolman, di e detayes di e contract di Arends, siendo cu su firma ta bou di e contract. 

BENEFICIO LUCRATIVO PA KOOLMAN 

Fuera di un contracto financiero lucrativo di e ex director (Koolman), loke a hala atencion segun e rapport, ta e beneficionan extra cu Koolman tabata ricibi, manera auto, y sigur pagonan extra of mas cu normal durante algun luna cu el a ricibi ( y cu mester a paga bek). Un relacion di trabou y cu sigur a hala atencion den e rapport, ta cu un compania proveedor cu ta parce di a haya e ‘contract’ principal di RdA, esta Grupo Technico de Servicio Company VBA (GTS), tabatin un ‘acuerdo’ balora na  mas di 2 miyon florin sin cu en realidad tabatin contracto firma cu e compania. Tur pasobra e director di e compania en cuestion lo tabata bon amigo di Koolman, e rapport ta bisa. Y asina tin un cantidad di punto cu ta resalta den e rapport, cu ta pone cu segun e rapport, por papia di ‘wanprestaties’. Por lesa e rapport completo AKI.