Juan David Yrausquin a entrega retiro di partido AVP

ORANJESTAD - Ex minister di Finanza  Juan David Yrausquin a entrega su retiro di partido AVP. E ex politico a confirma esaki awe mainta pa NoticiaCla.com. "Ta berdad. Fin di november aña pasa mi a skibi un carta pa Mike", Yrausquin a sigui bisa. Mes momento esey tabata e unico cos cu e por a bisa. Mientras cu ta aña pasa esaki a sosode, e no tabata den publicidad sino te e fin di siman aki. E noticia cu a cuminsa core tabata cu Yrausquin lo a 'distancia su mes for di partido AVP", y cu e intencion ta pa e uni cu un otro partido. Sinembargo Yrausquin no kier a bay asina leu. "Esey so mi por bisa na e momento aki"  Yrausquin a sigui bisa, refiriendo na e declaracion cu enberdad e la entrega su retiro na e partido perde. 

Manera ta conoci, Yrausquin aña pasa a haya su mes ta retira di como minister na july, despues cu e la bolbe for di Hulanda relaciona cu e asunto di presupuesto cu Gobernador Refunjol no kier a firma. Despues di esey, tabatin rumor cu e lo a bira e consehero principal di su sucesor Angel Bermudez y posiblemente su 'Chief of Staff'. Algo cu Bermudez a desmenti , pero a laga caminda habri pa e experticio di Yrausquin pa un tempo indefini. Esaki sinembargo nunca no a materialisa. A sali na cla cu Yrausquin a haci uso di su derecho pa cobra 'overbruggingstoelage' pa e periodo cu e tin derecho riba dje. 

Noticia no confirma tabata circula diadomingo anochi cu lo tabatin un reunion pa lanta un partido nobo, pero no por a confirma esaki. Y e noticia awe mainta a circula cu  Yrausquin lo a sea forma parti di e partido nobo aki, of un otro partido existente. NoticiaCla.com lo sigui e noticia aki di serca.