ORANJESTAD - Mientrastanto cu famia di e awor conoci Baby Ronin ta organisando campaña pa genera fondo pa manda nan criatura pa Merca, Organo Ehecutivo AZV tambe a tuma nota den prensa di un situacion fastioso cu un di nos aseguradonan ta hayando su mes aden. Aunke nan no ta bisa esey na inicio di nan comunicado, ta trata di e caso di Baby Ronin. ParticularmenteA ZV a dicidi e ora di informa comunidad di Aruba di e procedura pa cuido medico den exterior y asina por comprende con AZV ta atendiendo cu e caso specifico aki di nos asegurado. Aunke Aruba tin hopi specialismo medico, por sosode cu bo ta bira malo y haya un malesa cu na Aruba no por yuda bo. Bo specialista e ora ey ta haci un peticion na AZV pa bo haya cuido medico den exterior. Solamente cu un aprobacion adelanta di AZV, e gastonan di cuido medico den exterior ta wordo cubri. Akinan ta conta cu mester tin paspoort na ordo y of otro documentonan legal, por ehempel den caso cu ta aplicabel, un visa valido.
COMISION CGZ
E peticion ta wordo evalua door di un comision independiente, esta e “Commissie Grensoverschrijdende Zorg” (CGZ). E comision aki ta evalua a base di dos punto: esta si e tratamento cu ta wordo pidi ta medicamente necesario y si e ta tratamento cu ta wordo pidi no por wordo haci na Aruba. Tambe ta conta den e evaluacion cu conforme Ley AZV ta cubri tratamentonan cu ta ‘comun’ dentro di e specialismo medico.
APROBACION
Ora cu bo haya un aprobacion di AZV, esaki ta nifica cu AZV ta bay regla e afspraak, biahe y estadia pa e asegurado y su acompañante social. E asegurado ta bay e pais cu AZV ta indica. E tempo pa warda pa haya un afspraak ta depende di e cantidad di luga cu tin disponibel na e hospital. Ora bo tin un aprobacion, AZV ta cubri: pasashi (ida y buelta) di e pashent y di un acompañante social, di cual e acompañante social tin un aporte propio di 300 florin pa e ticket, e gastonan medico (e.o. ingreso den hospital y e operacion of test), un compensacion pa hotel den forma di un carta di garantia di AZV y un aporte (financiero) pa yuda den e gastonan di cuminda y awa di e pashent. Dependiendo di e urgencia di e peticion, lo determina con lihe e asegurado ta bay exterior. E biahe ta pa medio di un avion comercial. Den caso di hopi urgencia, un air ambulance ta wordo regla.
UNABES DEN EXTERIOR
Unabes cu e asegurado ta den exterior, e ta ricibi e tratamento cu a wordo pidi. Sin embargo, por sosode cu na yegada den exterior, ta resulta cu e asegurado (pashent) por tin mas complicacion y of otro malesa. E ora e situacion ey ta wordo evalua di nobo door di CGZ y AZV. Durante di e tratamento den exterior e contacto entre e hospital den exterior, e specialista di Aruba y AZV ta keda. Asina por constantemente evalua e situacion y dicidi kico ta haci. Ora e asegurado keda cla, e ta regresa mas pronto cu ta posibel.
CASO BABY RONIN
Baby Ronin ta un caso medicamente complica y unda AZV a busca conseho medico di otro clinicanan den exterior. Un procedura cu ta masha comun den mundo medico, esta cu ta busca opinion of conseho di otro expertonan medico. Den e caso aki, AZV a busca conseho di Hulanda y Colombia.
AZV tin comprension pa e situacion di baby Ronin y e mayornan, sin embargo AZV ta keda obliga pa actua conforme ley AZV. Akinan ta conta cu ora haci e evaluacion ta aplica e mesun criterionan pa wak si tratamento medico via Fondo AZV ta posibel. Actualmente AZV ta den busca di opinion medico cerca e hospitalnan cu AZV tin un contracto cu ne. E meta ta pa purba yega na un solucion dentro di loke Ley AZV ta permiti. Ta keda na e mayornan e libertad pa scoge pa apela e decision di AZV (bezwaarschrift procedure) of pa opta pa otro solucion pafo di e seguro AZV.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.