Vroegop: Hospital tin hopi presion y personal ta yegando su limite

ORANJESTAD – Hospital Horacio Oduber ta riba su limite di capacidad aworaki. “Cerca nos tin hopi presion” director general di hospital Jacco Vroegop ta confesa na Noticiacla.com. E contesta tabata basa riba pregunta di noticiacla.com riba e situacion di hospitalisacion di pashentnan di Corsou y Bonaire y na ki momento lo mester stop di tuma mas pashent di e islanan ey. “Casi nos no por mas” e director a sigui bisa refiriendo na e presion cu tin den henter e hospital pero mas= relaciona cu e situacion di Covid19 pa loke ta e personal cu ta trahando cu alma y cuerpo pa asisti cu e situacion di e pandemia. “Pues nos ta spera pronto mas alivio” e director a continua bisando. E ta referi na e situacion particularmente den cuido intensivo. 

SITUACION 

“Ta berdad cu nos a bisa ora cu nos a mishi cu e di 19 y di 20 cama di ICU (Cuido Intensivo) cu nos no por a tuma mas” e director a confesa. “Pero, e cantidad di hospitalisacion den ICU ta varia (tin hende ta drenta y sali ) y e ora ta logra nos pa tuma un hende mas. Tin biaha e ta un reto. Bo no kier dicidi riba bida di hende riba ambos lugar, si toch bo tin lugar ainda”, e director a bisa. Mientrastanto e ta relata cu e situacion na Corsou a mehora (capacidad di hospital pa Covid19) cu ta nifica tambe poco mas alivio pa Aruba mes. Pero esey no kier men cu e ta cla. 

SITUACION CORSOU

Segun e director, danki Dios cu e situacion ta bay miho na tanto Corsou como Bonaire, y como tal ta spera cu no mester traslada mas pashent (pa hospital di Aruba como solidaridad). “Nos lo sigui monitor e situacion. Y si por, nos lo traslada nan bek (pa nan respectivo isla). Esey ainda no a logra pasobra ainda e pashentnan no ta ‘fit to fly’, (osea suficiente fuerte pa bula den avion)” e director a sigui bisa. E ta sigui bisa cu nan tin hopi presion mes y tur hende casi no por mas. “Pues nos ta spera cu pronto e situacion por alivia”, e director a finalisa bisando.