Minister Lampe na SKOA: Mi no tin motibo pa rectifica

ORANJESTAD – Minister di enseñansa Rudy Lampe a bisa cu e no tin nada di rectifica na Stichting Katoliek Onderwijs Aruba (SKOA). Cu esaki e ta contesta e exigencia di e fundacion escolar di un dia prome cu a exigi e mandatario ‘rectifica acusacionan infunda’. Tabata diamars cu e minister  tabata presente den conferencia di e partido RED. E mandatario a papia di dos tema di cual uno tabata Cannabis y e exigencia di SKOA pa e rectifica su declaracion, algo cu el a bisa cu no tin base pa haci.

Hopi breve e mandatario a bay riba e tema di SKOA y rectificacion pidi pa motibo e ta kere cu nan demanda no tin base. Su Abogado a informa SKOA caba cu lo no tin rectificashon pasobra no tin motibo pa esaki. “Loke cu mi a trece dilanti, tur hende por lesa e sentencia di Hues, Mi no a inventa nada. Ta Hues a duna sentencia unda claramente e ta bisa cu trahadonan di SKOA a wordo tuma na trabou contra ley. Esey ta un sentencia di Hues.”

Den e relato financiero di SKOA, cu nan mesun palabranan, a pone cu nan no por cumpli cu nan obligacionnan fiscal na pais Aruba. “Tampoco mi a inventa e palabranan aki y ta poni den nan relato anual, cu nan tin un debe miyonario cu pais Aruba. Tur hende por verifica loke mi a trece dilanti.  Pa tal motibo mi no tin motibo pa rectifica.”