Encuesta: Mayoria lo vota den eleccion na juni pero no lo vota mescos

ORANJESTAD – Segun e ultimo encuesta politico di Noticiacla.com, e interes pa vota den e proximo eleccion parlamentario na Aruba na juni ta grandi. Pero di e grupo ey, mas cu mitar lo vota diferente e biaha aki. Y di e grupo aki mayoria sa caba pa ken nan vota, compara cu e encuesta anterior. Ademas, tin un division casi mitar di esnan cu ta prefera un gobierno di coalicion riba un gobierno di un solo partido. Y un cantidad grandi di esnan cu a participa den e encuesta, no kier bishita politico na cas, pa motibo di Covid19. Esaki ta e impression inicial di e encuesta ultimo haci pa noticiacla riba patronchi di votamento pa e proximo eleccion. Den e encuesta aki, un total di 848 persona den tur 6 districto a participa durante 5 dia di forma electronico. Ta conciente cu esaki no ta nifica cu e ta representativo ni cientifico pero si ta material pa pensa ariba kico ta biba eyfo. \

KICO POR SPERA E ELECCION AKI

Segun resultado di e encuesta, 93% cu a participa na e encuesta, a vota den e eleccion anterior. Di e grupo aki, 92% a bisa di lo vota atrobe den e eleccion aki. Pero ora cu a puntra entre esnan cu lo vota, si nan lo vota mescos, ‘solamente’ 49% di e grupo aki a bisa cu nan lo vota mescos. Y 36% a bisa cu nan lo vota diferente. Y compara cu e encuesta anterior, e grupo di persona cu no tabata sa pa ken nan vota, a bira menos. Esaki pasobra segun e encuesta aki, 70% di persona a bisa cu nan sa caba pa ken nan vota, sea ta pa e mesun persona of partido, of pa un otro. 

EDAD Y DISTRICTO

Ora cu bay separa e grupo di votador cu lo vota mescos of no pa edad y districto, esaki tambe ta interesante. E districto cu mas lo vota mescos e eleccion aki, ta Santa Cruz (58%) y esun cu mas a resalta di lo no vota mescos ta Noord (57%), pues e cambio lo bin di eynan, segun e encuesta. Tambe interesante ta e edad di esnan cu ta vota mescos. E grupo di edad mas halto, 65 aña y mas halto, ta e grupo cu lo vota mescos cu eleccion anterior (64%) mientras cu e cambio den voto (segun e encuesta aki) lo bin di e grupo di edad mas hoben. Aki 59% y 62% cu ta representa e grupo di 25 pa 34 aña y 35 pa 44 aña respectivamente, ta bisa cu nan lo no vota mescos of no sa ainda. Esnan cu kier un solo partido na mando, tambe ta e grupo di mas edad (65 aña y mas halto) cu a vota 52% pa un partido, mientras cu e grupo di 35 aña pa 44 aña a scohe pa un gobierno di coalicion (57%). Pues ta cla cu tin un diferencia entre e gruponan di edad. Pa loke ta bishita politico na cas, segun e encuesta, e resistencia ta bin di e grupo di mas edad, unda cu 75% y 85% cu ta respectivamente e grupo di 55 aña pa 64 aña y 65 aña bay ariba no kier bishita di politico. Y ta e grupo di edad mas abou (45%) si kier bishita. Pa loke ta e districto, Paradera tin mas resistencia pa ricibi politico na cas (79%) mientras cu tin un empate entre Savaneta y San Nicolas (27%) cu ta e dos districtonan cu mas ta receptivo pa ricibi bishita di politico na cas (27%). 

BISHITA DI VOTO Y TIPO DI ELECCION

Mirando cu nos lo ta votando mei mei di un pandemia, a puntra tambe ki tipo di campaña ta deseabel, den sentido di bishita di cas manera ta e forma tradicional di campaña. Entre esnan cu a participa na e encuesta, e mayoria (76%) no kier bishita di politico na cas, pa motibo di Covid19. E grupo cu si kier, ta relativamente chikito cu  24%. Y mirando loke a pasa na Corsou y Hulanda unda cu Corsou a tene su eleccion riba un dia, mientras Hulanda a reparti esaki den tres dia, aki, mayoria cu a participa, a scohe pa un solo dia (60%).