Den programa ‘Politica ta Cruel’, PPA a bisa cu no ta traha cu MEP of AVP

ORANJESTAD – Partido PPA Transforma no ta dispuesto pa traha cu partido MEP y partido AVP, si yega asina leu den eleccion y cu mester forma un coalicion eventualmente. Asina e lider nobo Lisette Malmberg a bisa durante e programa Politica ta Cruel cu ta un coleboracion cu Den Cayente, riba e Plataforma Sopi Mix Studi. E programa tabatin hopi informacion politico di maneho di e partido PPA, pero tabata casi na final di e programa tabatin un parti interesante unda cu dos periodista invita a haci e pregunta si e tabata dispuesto pa traha cu AVP, el a contesta no. Y despues a puntra mescos pa MEP, y aki tambe el a bisa no. E ta dispuesto pa sinta cu partidonan chikito y por forma un tipo di aliansa. Pero, no por papia ainda di un ‘block’, pasobra ta mucho tempran y e no sa si ta necesario. “Pero e ta un posibilidad” Malmberg a sigui bisa. Algun persona ta pensa cu e 'move' aki di sra Malmberg, no tabata esun miho, ya cu for di un principio bo ta 'schakel' bo mes 'uit', si yega asina leu pa forma gobierno. Algun ta considera esaki un fayo di nobato politico y ta spera cu por 'reconsidera' e pensamento aki. Pero cu un declaracion asina, for di comienso e ta nifica cu e partido ta cera su mes di inclusion di un posibel coalicion real, mirando cu e realidad ta cu cualkier coalicion, lo mester wordo forma cu sea un di e dos partidonan grandi mas sigur, a lo menos cu bin un sorpresa y cu e partidonan 'chikito' logra saca suficiente asiento cu e ta cambia e panorama pa e dos partidonan grandi AVP y MEP.  E programa ta pasa un of dos biaha pa siman y ta un tipo di podcast unda cu 4 persona (incluyendo e invitado) ta sinta na un mesa vierkant y papia riba politica. Potret ta cortesia Politica ta Cruel. Por mira e programa completo AKI.