Sospechosonan R. y F. a recobra nan libertad temporal di e caso Avestruz

ORANJESTAD – E dos sospechosonan den caso penal di fraude Avestruz , esta Jeffrey F. y Rebecca R. a recobra nan libertad temporal dialuna. A compronde cu prome cu por a presenta un caso pa e.o. libertad di F, a dicidi cu ambos por a bay liber temporalmente. Diadomingo a haci un siman cu R. tabata cera y awe un siman cu F. tabata cera. Cu libertad di e dos personanan aki ainda tin 3 persona deteni. Uno ta Leoncita A. cu diamars ta haci un siman deteni pa mesun cargo cu R. mientras cu awe mainta e Pareha Werleman-Nuñez a keda deteni tambe pa nan participacion den e actonan cu ta encera e caso. Ministerio Publico a bisa siman pasa caba cu no tabata descarta mas detencion den e caso aki, di cual ta premira cu e sospechoso principal Benny Sevinger tambe por bira un ‘victima’ di detencion.