SKOA ta refuta acusacionnan infunda di Minister Rudy Lampe

ORANJESTAD – Stichting Katholiek Onderwijs Aruba (SKOA) SKOA ta refuta acusacionnan infunda di Minister Rudy Lampe. Asina e fundacion a bisa dialuna den un conferencia di prensa. Su director Anuesca Baly a refuta energicamente e acusacionnan cu nan ta considera sin base cu minister demisionario di Enseñansa Rudy Lampe a haci den conferencia di su partido dia 6 y 13 di april ultimo. Na e ocacion ey segun SKOA, minister Lampe a acusa SKOA di ta comete actonan ilegal den maneho di personal, di inhabilidad pa cumpli cu debernan di afdracht y di a instiga maestronan di scol pa demonstra contra e mandatario.

SKOA ta rechasa cada un di e acusacionnan sin base di e mandatario. "Nos ta carga responsabilidad pa tuma personal den servicio di e fundacion hunto cu Directie Onderwijs en Inspectie. SKOA ta busca y tuma personal basa riba necesidad den field. Nos ta pasa tur solicitud pa Directie Onderwijs en Inspectie pa control y aprobacion. E instancia aki despues di a controla y aproba e solicitudnan ta tuma e desicion final. Siguiendo e procedura aki SKOA ta garantisa transparencia den tumamento di personal na trabou" asina e director di SKOA Anuesca Baly a declara.

Baly a sigui splica cu mescos ta conta pa e afdracht, esta pago di beneficionan social di e trahadornan di limpiesa na scol y tambe e pension di maestronan di scol. Di acuerdo cu proceduranan existente SKOA ta ricibi e fondonan destina pa afdracht for di departamento di Finansa y ta pasa esaki pa departamento di Impuesto. Pues, e pago di beneficionan social di e trahadornan di limpiesa y e pension di maestronan ta depende di e placa cu ta bini di departamento di Finansa. Nan no tin nada di haber cu situacion financiero di SKOA. Si tin prueba di actonan ilegal SKOA lo exigi un investigacion profundo y lo coopera completamente cu esaki, segun e director di e fundacion.

Pa locual ta e malcontento y protesta di e maestronan e director di SKOA a bisa cu e maestronan den nan protesta a indica bon cla cu nan ta solidario cu e trahadornan di limpiesa, kendenan su trabou ta na peliger. SKOA ta ta reconoce importancia di e trabou cu e trahadornan di limpiesa ta haci y mas ainda den e tempo di COVID aki. Ta sumamente esencial pa ofrece tanto alumno como maestro y demas personal na scol un ambiente limpi, sano y sigur den cual nan por studia, desaroya nan mes y eherce nan trabou.

SKOA ta di opinion cu si tin prueba di corupcion y ilegalidad den cualkier institucion den comunidad, especialmente esnan cu ta traha cu placa di pueblo, mester investiga profundamente y e culpabelnan mester sinti tur e peso di ley. Pero acusacionnan infunda ta conduci na un ambiente di desconfiansa y ta afecta e trabou di SKOA den un forma negativo. Pa e motibo aki SKOA a instrui su abogadonan pa manda un carta pa ministro demisionario di Enseñansa dr. Armando Rudy Lampe solicitando e pa rectifica e acusacionnan serio y sin base cu e la haci den conferencia di prensa di su partido dia 6 di april ultimo y cu e la ripiti dia 13 di april. Te asina leu e declaracionnan di director di SKOA, Anuesca Baly den e conferencia di prensa awe mainta den sala di reunion na oficina di SKOA.