Ministerio Publico: No ta exclui mas detencion den caso Avestruz

ORANJESTAD – Ministerio Publico di Aruba a duna indicacion cu por tin mas detencion na caminda den e caso Avestruz, ‘ den e periodo venidero’. Diabierna Ministerio Publico a kibra silencio riba e caso, ora cu nan a emiti un comunicado riba e.o. e detencionan cu a tuma lugar. Den e comunicado aki tambe nan a pone cu ‘Landsrecherche no ta exclui cu lo bin mas detencion den e periodo venidero’. No a bisa ki tempo pero ta premira cu e simanan nos dilanti. 

E DETENCIONAN

Ministerio Publico den e comunicado a referi na “algun detencion e siman aki den cuadro di e investigacion Avestruz di posible delitonan di corupcion y otro hechonan castigable relaciona cu dunamento di terenonan di gobierno. Ta trata di e personanan di inicial R.R. en M.A. en P.F.”

KICO NAN A HACI  

Segun Ministerio Publico, Avestruz ta dirigi su mes particularmente riba e pregunta si un of mas compania a wordo otorga incorectamente (un opcion riba) derecho di erfpacht riba terenonan di pais Aruba den e añanan 2009 te 2017. Den esey ta investiga tambe e rol cu un ex-minister a eventualmente hunga. E sospechosonan cu a wordo deteni e siman aki tin varios rol den e investigacion. “ Ministerio Publico no ta exclui cu lo bin mas detencion den e periodo venidero” e comunicado ta finalisa bisando.

SEVINGER

E minister cu Ministerio Publico ta referi na dje, ta Benny Sevinger, cu e siman aki den un conferencia di prensa extraordinario di e partido, a duna indicacion cu e por ta proximo riba lista di esnan cu nan lo por bin detene. Y el a bisa cu e ta premira cu nan lo bin deten’e, boei e, y hibe cera. Y mes momento el a bisa cu e no ta bay huy. Pero segun e abogado, no ta kere cu esaki lo sosode asina lihe.