Partido politico PPA a presenta su lider nobo Lissette Malmberg

SAN NICOLAS – Cu 10 siman faltando pa eleccion parlamentario 2021 di Aruba, partido PPA a presenta su imagen y lider nobo diahuebs anochi. Den un bachi nobo, y na e sede ‘bieu’ di e partido, e conocido comerciante y pastor religioso sra Lissette Malmberg a keda presenta como e lider nobo di e partido. Sra Malmberg den su discurso, a sigura cu e movimento ta cla pa convence ‘ciudadonan’ manera e mes a yama e votadornan potencial pa e partido, pa ‘bay parlamento’, esta pidiendo nan pa uni cu e partido den su bachi nobo. Basa riba 7 principionan fundamental, Malmberg kier trece e cambio cu mester pa logra trece Aruba dilanti atrobe.

PAKICO MALMBERG

Malmberg a splica cu inicialmente su intencion tabata pa bin cu un Plataforma nobo titula Transforma, pero debi na e retiro di gobierno recien, nan no a keda cla pa registra e partido oficialmente (e tabata cla cu statuto y inscribe na KVK si) na Electorale Raad, pues mester a busca un otro alternativa. A corda e ora cu den pasado e partido PPA a haci apelacion riba dje pa uni cu e partido y te hasta bira su lider nobo. Pero na dos occasion (dos eleccion pasa caba) el a gradici pero a bisa cu e no tabata cla. Awor si el a informa e directiva cu e tabata cla y a cuminsa cana e caminda. Tabata diaranson anochi cu durante reunion y congreso di partido, a apunta Malmberg oficialmente como e lider nobo di e partido. Malmberg a sigura cu su backround religioso lo no wordo bruha cu e partido aunke cu tin cierto principio cu ta cuadra cu otro. Pero cu e partido ta un movimento civico y no religioso y esaki lo ta bon separa. A splica su historia y con el a yega te awor pa bay asina leu di tuma e mando di un partido politico. 

FUTURO

E lider nobo a sigura e portal aki cu mientras cu e website di e partido y e presentacion tabata bisa ‘Transforma PPA’, (e website ta www.transformaaruba.com), e partido politicamente lo yama PPA y cu Malmberg na cabez. Ademas el a sigura e portal aki riba e pregunta haci, cu nan ta dispuesto pa sinta cu e otro partidonan chikito pa cera un possible alianza prome cu e entrega di lista ainda (cu ta dia 7 di mei proximo) si ta necesario, y asina bay aun mas fuerte pa eleccion. Keda pendiente den e proximo dianan pa haya sa mas di e partido politico cu a haya un ‘bida nobo’ diahuebs anochi.