Detencion di e tres sospechosonan di caso Avestruz prolonga cu 8 dia

ORANJESTAD – Tur tres sospechoso deteni e siman aki den e caso penal Avestruz nan detencion a keda prolonga cu 8 dia. Por lo menos for di un di nan abogado, Leoncita A. su abogado Doris Canwood a confirma su cliente y a compronde cu e otro dosnan tambe. Awe Hues comisario mester a toets A. y e otro F. No ta conoci si e prome sospechoso deteni, Rebecca  R. tambe su detencion a keda prolonga awe mes of mas prome. Esaki kier men cu ainda no tabata cla cu e interogacion y cu mester mas informacion prome cu por laga nan bay den libertad condicional. 

DETENI 

Manera ta conoci, for di diadomingo ultimo e detencionan den e caso cu a cuminsa na October di 2019 cu entrada hudicial na varios cas di varios persona incluyendo ex minister y actual parlamentario Benny Sevinger, riba e asunto di malversacion, falsificacion di firma y soborno rond di otorgamento di tereno den erfpacht entre 2009 y 2017. E prome detencion tabata diadomingo ora cu e dama Rebecca R. a yega di exterior y a wordo deteni na aeropuerto mes. E di dos detencion a sosode su manese dialuna ora cu a detene Jeffrey F. y a sigui diamars cu e detencion di e comerciante Leoncita A. na su cas. E sospechoso principal, e parlamentario Benny Sevinger ta premira cu e lo wordo deteni proximamente pero esey ainda no a sosode.