BAZV: Gobierno lo remedia cobransa, MEP ta yame un blunder

ORANJESTAD – Minister di Finanza Angel Bermudez ta sigura cu lo remedia e asuntodi cobransa di BAZV y partido MEP ta considera henter e asunto un blunder di gobierno. Bermudez a reacciona riba e carta cu Camara di Comercio (KvK) a manda pe siman pasa. Ta trata di e confusion cu ta reina en cuanto e aplicacion di BAZV. Riba esey, e mandatario a dicidi di bolbe reuni cu e directora di Departamento di Impuesto y hunto nan a yega na un acuerdo cu den un termino corto lo ripiti e sesion di informacion tocante e aplicacion di BAZV. Remarcabel segun e mandatario, ta cu aunke cu BBO ta existi pa basta aña caba, e BAZV cu ta colga na e BBO (pues ta mesun sistema) cu e tarifa di 1%, aparentemente ta trece asina tanto dificultad pa comercio den su ehecucion. Bermudez personalmente a observa cu hasta companianan di Gobierno ta aplica e ley na un manera robes, pasobra mescos cu e ley original di BBO, e BAZV no mester wordo calcula riba ningun factura, como si fuera ta un impuesto cu ta cobra e consumidor.

CON PA COBRE

“E BBO y BAZV ta wordo cobra riba e comerciante y no e consumidor”, e mandatario a indica. Minister di Finanzas ta sigui splica cu e unico cos cu e ley di BAZV ta exigi ta un frase riba e factura cu ta indica cu loke ta wordo cobra pues e montante final pa paga tin BZAV inclui. Ta trata aki di e 1% di BAZV inclui caba y no e calculacion mes, paso e consumidor no tin nada di haber cu esey.

DIFERENCIA CU SALES TAX

“BAZV igual na BBO no ta un ‘final’ sales tax, pero e ta un cobransa riba e benta mensual di e comerciantenan”, Minister Bermudez a splica. Finalmente, e directora di Belastingdienst a informa e mandatario cu nan ta preparando un campaña di control y cu pronto e ekipo di control aki lo subi caya pa controla den comercio si e leynan di Loonbelasting, AZV, BBO y BAZV ta wordo aplica segun ley ta indica.

MEP TA CONSIDERE UN BLUNDER

Pa partido di oposicion MEP, nan ta considera e implementacion y ehecucion pura di BAZV un blunder di Gabinete Eman. Den un comunicado di e partido, Gerick Croesta bisa cu "Sopi pura ta sali salo". Esaki sigur ta un expresion cu ta cuadra cu e accion di Gabinete Eman ora cu 1 december 2014 e BBO a wordo aumenta cu 1% di BAZV. Segun Croes, e ehecucion di e impuesto aki a causa hopi frustracion den nos comunidad. Banda di esaki na e momento di implementacion hopi comerciante tawata bruha/mal informa con pa presenta esaki (si of no) riba nan factura. A resulta despues cu mayoria ta cobrando e impuesto na un forma incorecto y esaki ta netamente loke nos di oposicion a vocifera y trece padilanti. Tur dede tawata mustra cu ciudadanonan como consumidor a sali perhudica pasobra ta paga mas ora di wordo cobra BBO y BAZV.