Expansion di aeropuerto di Aruba ‘Gateway 2030’ ta inicia na juni di 2021!

ORANJESTAD – Aeropuerto su proyecto di expansion Gateway 2030 ta continua, no obstante e efecto di pandemia. Asina gobierno y gerencia di aeropuerto a informa diahuebs mainta. E proyecto mester a inicia aña pasa pero a para esaki debi na e pandemia. Cu e decision pa continua cu e plan awor, no obstante cu e pandemia ta andando ainda, a dicidi cu ta haci algun cambio si compara cu e plan inicial. E intencion ta pa e groundbreaking tuma lugar dia 1 di juni proximo pa e prome fase. 

CAMBIONAN

Durante e presentacion di e director di aeropuerto Joost Meijs, el a splica cu pa por a dicidi pa continua toch cu e proyecto awor, a tene cuenta cu 3 punto. E prome ta cu ta continua cu e proyecto toch awor aunke cu tin Covid19 ainda. Esaki pensando cu e pandemia ta temporal y cu ya caba ta mirando señal di mehoracion caba. “Cifranan semanal ta indica esaki” e director a bisa. E di dos punto di consideracion, tabata pa haci e proyecto aki awor den fase, pa asina por mira sistematicamente kico mester cambia y pa tin un miho control durante e ehecucion di e proyecto. Ta trata di e fase 1A cu ta inclui un Bagage Claim nobo, un Baggage handling system nobo y un US checking gate expansion. Segun Shansley Tromp di AAA, e intencion ta pa entrega e prome fase na februari di 2023, e di dos parti na augustus di 2023 y e proyecto completo lo bay ‘live’ esta keda cla na juli di 2024. Pa loke ta e di 3 punto, A dicidi cu envez di usa 5 compania di construccion di exterior, ta bay usa 5 compania local, cu ta bay crea empleo pa 200 trahado, y ta un inversion di 150 miyon dollar Mericano. E companianan local cu lo forma parti di e proyecto, lo ta e.o. Albo Aruba y  Bohama Aruba lo ta encarga cu e trabou en general, mientras cu Arubaanse Wegenbouw lo ta encarga cu e parti di infrastructura, y Croon Carib lo haci e parti electrico, y CHS lo haci e parti technico.