Aruba awor tin su unidad propio pa gara cacho cu ta riba caya

ORANJESTAD - Diaranson 14 merdia a tuma lugar inauguracion di e Unidad di Control di Cacho ‘Dog Control Unit’. Prome Minister Evelyn Wever a duna di conoce cu desde cu el a drenta den gobierno, su compromiso tawata pa atende cu e problema di cacho riba caya. Danki na e cooperacion di Ministerio di Husticia, Andin Bikker, y Ministerio di Salud, Dangui Oduber, y e cooperacion den e dos ministerionan cu ta wordo maneha pa e Ministerio di Asuntonan General y Infrastructura, a haci posibel cu a habri e Centro di Control di Cacho na juli aña pasa. Un Centro cu tabata e culminacion di un trabao conhunto y coordina pa cuatro diferente ministerio y a inicia for di e ministerio di Prome Minister. Esaki pasobra den comunidad tin un deseo grandi pa e problema serio di cacho riba caya wordo atendi. Realmente e lo no por tawata posibel sin e cooperacion di un cantidad di otro profesionalnan cu a aporta na e proceso pa nos a yega na e Centro di Control di Cacho. Mester tene cuenta si cu e servicio di e unidad aki no ta pa recoge bestia morto riba caya si, pasobra esey ta keda tarea di Serlimar. 

ELIMINA KILL CAGE

“Den e tempo cu a transcuri desde aña pasa te cu awe, cosnan positivo a pasa. E aspecto mas importante den full e proceso ta cu a elimina e asina yama “kill cage”. Na su luga nos tin e “Centro di Control di Cacho” aki. Un luga bao di un maneho responsable, caminda, apesar cu doñonan ta trece nan mascotanan indesea, e gran mayoria di e mascotanan ta wordo brinda un segundo oportunidad”, e mandatario a expresa. 

TAREA PRINCIPAL

E unidad aki su tarea principal ta pa pasa recoge e gran cantidad di cachonan cu ainda ta cana los, tanto esnan cu doño, como esnan sin doño. Asina nos ta spera di reduci e cantidad di cachonan riba caya te na un cantidad cu no ta causa molester y cu no ta forma peliger pa e cachonan mes ni pa nos muchanan, nos deportistanan, nos automobilistanan y tampoco pa nos turistanan. E cachonan aki lo wordo hiba na e Centro di Control di Cacho pa wak si ta logra reuni nan cu nan doño. Ta importante pa remarca cu cacho y pushi morto ta keda trabou pa Serlimar y no por yama e Unidad di Control di Cacho pa recoge bestianan aki morto riba caya.

MAS TAREA

Piki cacho cu ta cana los lo no ta e unico meta. E Unidad di Control di Cacho lo ta tambe un Unidad cu lo controla e supervision y cumplimento di entre otro nos Ley di Cacho cu ta na vigor desde 2015. E lo ta un alivio y alaves cooperacion pa y entre Cuerpo Policial y Bureau City Inspector. E vehiculo aki, ta un van cu Minister di Husticia a facilita y cu awe e ta entrega simbolicamente na Bureau City Inspector, pa por eherce e funcion aki. Si e unidad recoge un cacho for di caya y ta resulta cu e cacho tin doño, esaki por tin consecuencia pa e doño a base di su responsabilidad segun e Ley di cacho. P’esey ta conseha doñonan di cacho pa percura pa nan cacho ta den cura.

GRADICIMENTO

Prome Minister ta expresa su gratitud na e Actiecommitee cu ta yuda den atende e problematica di cacho riba caya. Gradicimento tambe na Irene Croes, voorzitter di e Actiecommittee pa su pasion y persistencia. Gradicimento ta bay tambe na Bureau Minister di Husiticia pa e logro aki cu ta hiba nos un paso mas cerca pa soluciona e problematica di cacho riba caya. Un danki special ta bay na Bruce Harms di Special Projects di Ministerio di Asuntonan Social, pa e design di e logo y con e la diseña e wrap pa hink’e bunita den otro.

PROBLEMA EXISTENTE

“E problema di cacho riba caya ta un problema existiendo pa hopi tempo, pero gobiernonan anterior nunca a pone atencion na dje. Apesar di tur e retonan, apesar di un pandemia mundial, nos Gobierno a pone nos empeño y cu poco placa, a logra cosnan grandi riba e tereno aki. Pero nos no por haci’e nos so. Nos mester combati e problema aki hunto. Cu bo, nos por".