- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
Landsrecherche a scucha Alan Howell diaranson como sospechoso
ORANJESTAD – Lider di partido politico POR Alan Howell a keda scucha diaranson atardi oficialmente como sospechoso den e caso di malversacion di fondo. Algun siman pasa sr Howell a keda informa cu a pone beslag riba un di su cuentanan bancario y un cuenta di e fundacion di e fraccion POR den Parlamento, basa riba sospecho di malversacion di fondo. Vocero di Ministerio Publico Ann Angela diaranson atardi a confirma pa noticiacla cu sr Howell enberdad tabata na Landsrecherche como sospechoso.
RIBA PROPIO BOLUNTAD
Sr Howell mes ora cu a haci’e e pregunta despues si awor si e ta un sospechoso, a bisa cu e no ta bay contesta e pregunta ey awor. E lider politico a wordo invita pa haci un declaracion y despues por a bandona e edificio riba propio boluntad. E no a bin eynan contra su boluntad.
OPORTUNIDAD
Mientras cu sr Howell no kier a bay riba e pregunta si awor si nan a label e como sospechoso, el a bisa e portal aki si cu e ta contento cu den un tempo lihe, e por a duna Landsrecherche su banda di medaya. Ademas el a sigura cu e no tin ningun duda den e trabou di Ministerio Publico y cu tur cos lo cana bon na final y cu e lo sigui su plan pa bay eleccion. Loke a hala atencion ta su declaracion na final cu tur hende ta bay 'scucha e berdad pakico gobierno a cay'.
RETIRO DI GOBIERNO Y RETIRO DI MIEMBRONAN POR
Ora cu recientemente sr Howell a keda confronta cu e beslaglegging riba un di su cuentanan bancario, prome minister Evelyn Wever a puntr’e si e ta bay retira como vice presidente di Parlamento, y sr Howell a informe cu no. Esey tabata suficiente pa sra Wever Croes dicidi pa entrega retiro di e gabinete, mirando cu no por a keda cu un miembro di su gabinete como sospechoso di husticia. Ademas mesora miembro di partido y lider di fraccion di POR Dellanire Maduro a distancia su mes di e partido y a bay cu su asiento y bira independiente. Te cu ayera, sra Maduro no por a bisa e portal aki si el a tuma decision riba su futuro y a keda di informa prensa despues di su decision.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
