Sevinger: ‘Probablemente den e dianan aki nan ta bay boei mi, detene mi’

ORANJESTAD – Parlamentario pa partido AVP Benny Sevinger a indica diamars atardi cu e ta conciente cu den e proximo dianan e lo por bira e proximo persona deteni den e caso penal Avestruz (e caso cu ta trata di delitonan di corupcion y otro hechonan castigabel  rond di dunamento di tereno den erfpacht entre 2009 y 2017). ”Probablemente den e dianan aki, nan ta bay boei mi, detene mi, whatever. Mi no ta bay huy” Sevinger a bisa, indicando cu e ta cla prepara pa ora cu e momento aki yega pa nan ‘bin busk’e, manera cu ta ‘buscando’ e otro sospechosonan den e caso. Mientras cu Sevinger a indica cu e lo por ta 'proximo', esey ta speculacion di su parti y no necesariamente e caso, manera cu e portal aki a compronde. Fuera di Sevinger y esnan deteni, tin mas persona cu ta mira como sospechoso y cu a haci entrada hudicial, cu lo por wordo yama prome. Tur cos ta den man di Ministerio Publico. 

DETENCIONAN DIRIPIENTE

Manera ta conoci, despues di un silencio di casi un aña y mei for di tempo cu a haci e prome entradanan hudicial na 2019 pa e caso, diripiente for di diadomingo ultimo e prome sospechoso a keda deteni y dialuna y diamars a sigui cu e otro sospechosonan. Mesora a cuminsa specula cu lo no dura mucho cu e sospechoso principal mes, e propio parlamentario Sevinger su turno lo yega. E parlamentario (hunto cu lider di partido Mike Eman) a tene un conferencia di prensa diamars atardi den loke a mustra un ‘preparacion’ di loke por spera nan (Sevinger) proximamente. 

BENNY TA BAY ELECCION OF NO?

Entre loke por spera nan y Sevinger particularmente, a duna un tipo di contesta di kico por spera di dje, relaciona cu e proximo eleccion, esta si e ta aparece riba e lista di partido pa e proximo eleccion cu ta dia 25 di juni proximo. Tabata te na final di su presentacion cu diripiente su voz a bira emocional unda cu Sevinger a sigura tur hende cu e lo tuma e decision den e proximo dianan, esta si e ta bay eleccion si of no. E no kier perhudica e partido cu su situacion, pues cu debi cu e por cay cera awor, esaki por tin efecto negativo pa e partido cu e ta forma parti di dje. Asina mes sinembargo, prome cu e declaracion ey, Sevinger a sigura cu ‘ni si Sevinger bay cera, MEP lo no gana eleccion!’, indicando cu kico cu pasa cu ne, e lo no afecta e eleccion pa cu e chensnan pa e partido cu e ta forma parti di dje. 

CARTA DI ABOGADO

Sevinger a bay den detayes cu corespondencia entre su abogado (mr David Kock di bufete DKLegal ) y Ministerio Publico unda cu e abogado a purba haya sa di e instituto aki con ta para cu e caso pa cu su cliente, mirando cu tin eleccion na caminda y cu e mester sa con e ta para. Mester tene na cuenta cu ora cu e abogado a inicia e corespondencia aki, Gabinete Wever Croes no a entrega retiro ainda. Ora cu e fiscal en cuestion a contesta e abogado, a inform’e cu no ta asina leu cu su cliente (Sevinger) ta pa persigui’e (y of posiblemente detene’).,  y cu si esaki sosode mes, lo no ta te despues di fin di September 2021. Na e momento ey, eleccion tabata poni pa 25 di September 2021. Despues di esey, diripiente Gabinete Wever Croes a entrega su retiro y a yama eleccion adelanta. Y diripiente e siman aki detencionan a cuminsa cay. Esey a pone cu e partido y Sevinger ta cuestiona e modus operandi di Ministerio Publico unda cu diripiente cos ta canando y envez di September, awor por cuminsa detene hende caba. Esaki ta pone Sevinger y e partido pensa cu tin motibonan politico tras di esaki, tambe di Ministerio Publico, cu influencia di Gobierno, pa influencia e resultado di e eleccion proximo, pa beneficia e partido na mando. Algo cu e partido y Sevinger a bisa di ta condena severamente.