Aruba ta conoce su di 4 caso di asesinato di e aña aki

ORANJESTAD – Aruba a conoce su di 4 caso di asesinato ayera nochi ora cu pa 10 pa 12 di mei anochi (23:50pm) e victima di tiro den cabez, Richie Henao Tavarez (20) a fayece na hospital a consecuencia di e herida di bala. Vocero di polis Lito Laclé a confirma e morto diamars mainta tempran. Manera ta conoci dialuna anochi 9:21, central di polis a haya notificacion cu un un hende homber a wordo tira na un cas na Brazil. Na jegada di e patruya a bin encontra un persona tira abou den veranda cu un tiro den cabes. E victima a wordo hiba cu maximo urgencia pa hospital y su situacion tabata critico. Mesora a pidi pa departamento di recherche, polis tecnico y slachtofferhulp. E caso ta bao di investigación.

Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn: 11141. Nos ta garantisa cu bo ta keda anonimo. Noticiacla ta manda palabra di condolencia na famia di e fayecido.