Wever: Tin 7 persona cu no ta bolbe riba lista di MEP e biaha aki

ORANJESTAD – Partido politico Movimento Electoral di Pueblo (MEP) tin 7 (shete) persona cu no ta bolbe riba e proximo lista pa eleccion 2021. Asina e lider di partido Evelyn Wever Croes a bisa dialuna mainta durante un conferencia di prensa unda cu a presenta nan prome candidato nobo. Ademas tabata interesante pa wak den fin di siman kenan sigur ta bin bek. Entre nan, uno cu a specula ariba cu e lo no bolbe, cu ta Chris Romero. Pero Romero ya caba a confirma na e portal aki cu rumornan cu e lo retira na mei, simplemente no ta berdad.

KEN SIN TA KEDA Y KEN NO 

E fin di siman aki diripiente varios candidato, minister y parlamentario a postula nan FB grafico cu ta bisa ‘VOTA pa’, y nan nomber, indicando cu nan lo ta bek. Awe mainta pues, e lider di e partido a confirma cu ta 7 so, lo no bolbe. Segun Wever, ta trata di Karel Jeandor, Jeremy Campbell, Carlos Jacobs, Daphne Lejuez, Luigi Bergen, Sharlene Starke y Karel Maduro. E mandatario no tabata mas specifico pero por a compronde e ora cu tur otro cu tabata riba e lista na 2017, lo ta bek riba e lista. Dia 7 di mei proximo, tur partido cu ta participa na e eleccion, mester entrega nan lista di candidato oficialmente. Y por spera cu mescos cu na 2017, e partido lo presenta un lista cu 29 candidato.