Nomber di prome morto den trafico ta conoci

ORANJESTAD – Autoridad policial a divulga nomber di e victima di e prome accidente fatal di trafico di awe marduga. Ta trata di Kevin Richard Wever, naci 8 di april 1997 y tabata biba na Brazil # 71. Tabata awe marduga banda di 4:35 am cu e accidente fatal a tuma lugar na e crusada banda di Pricesmart. E motociclista (Wever) tabata bayendo direccion pabou cu velocidad basta halto y segun testigo na e sitio, cu lus paga. Na e crusada, un chauffeur di un Honda Fit blanco A 1105 biniendo di Avenida Milo Croes, no ta mira cu e brommer tabata biniendo di pariba y ta subi e caminda principal, cu consecuencia cu e motociclista ta dal contra e auto y mesora ta fayece na e sitio. Polis y ambulance ta wordo pidi mesora na e sitio, pero na yegada personal di ambulance no por a hasi nada mas cu pidi pa un dokter pa constata morto. Varios unidad di Polis a yega na e sitio y a cera e caminda principal. Autoridadnan competente a wordo pidi na e sitio y algo pasa di 5'or Dr. Samuels a constata morto di e motociclista. E brommer ta un Pulsar MFA 754. E tabata biniendo di pariba. E motociclista a hit and run dos auto prome cu el a keda envolvi den e accidente fatal. Un di e autonan cu el a hit and run tabata un Altezza. El a ranca e bumper y sigui bay. Polis ta haci un apelacion na tur testigo cu lo por a mira algo mas prome of durante e accidente, pa por fabor tuma contacto cu departamento di trafico di Cuerpo Policial di Aruba. NoticiaCla.com ta manda palabra di condolencia na e fayecido.