MB riba bishita na cas, no ta ‘stroba’ politiconan di bishita cas den campaña

ORANJESTAD – E ministeriele beschikking actual pa frustra bishita na cas den cuadro di combatimento di Covid19, no ta stroba politiconan di bishita cas. Algun hurista local a confirma cu e MB actual cu e articulo specifico, tin un buraco grandi, cu ta pone cu e no lo logra e meta di ‘frustra bishita politico’ na cas di hende. Tanten cu e buraco aki tey, no por strobe politiconan di bishita cas, cu ta netamente un di motibonan cu Corsou ta den un situacion alaramente. 

E ARTICULO

E articulo 7, specifico 7.1 ta bisa textualmente (traduci) cu ‘ta prohibi pa ricibi bishita na cas, a lo menos cu esaki ta pa motibo familiar of di cuido, of un otro motibo necesario’. Y aki ta unda e problema ta bin cu ta ‘ un otro motibo necesario’. For di angulo legal, ta considera e palabranan ey e buraco grandi den ley. Esey pasobra, no ta defini e ‘otro motibo necesario’. Si e famia na e cas, determina cu e bishita di e politico ta ‘un motibo necesario’ pa e por p.e. determina pa ken e mester vota, e no ta contra ley. Loke ta un motibo ‘necesario’ pa uno, no ta uno pa un otro persona. Como tal, e ta laga un espacio pa interpretacion di e ley. A compronde den seno policial cu nan tambe tin problema cu e ley aki, debi cu e buraco ey, ta pone nan lomba contra muraya. 

CAMBIO DI E ARTICULO AKI

Pa e articulo tin peso y logra e meta, a compronde di huristanan, cu mester cambia e frase specifico ey, pa asina ‘cera’ e ‘buraco’ aki y pone den texto mas concreto pa asina ta mas specifico pa p.e. bisa ‘partido of politiconan’ no por bishita cas di hende, durante periodo di campaña, of algo den e direccion ey. Mientrastanto e MB keda manera cu e ta, bishita politico no ta bira un obstaculo y no por actua contra esaki. Ta keda awor na cada persona con pa interprete y pa mira cu nan ta tene nan mes na ley.