Prome detencion a cay den caso penal Avestruz

ORANJESTAD – Diadomingo atardi, e prome detencion den caso penal Avestruz a cay na aeropuerto di Aruba. Vocero di ministerio publico Ann Angela a confirma cu autoridad a detene e dama R.R. momento cu e kier a bandona Aruba. E ta e prome detencion tambe den e caso cu a inicia na comienso di 2019 ora cu autoridad a drenta cas di parlamentario Benny Sevinger (AVP) y comerciante Leoncita A, unda cu ta sospecha Sevinger e.o. di falsificacion di domcumento, estafa y labamento di placa. Tabata acusa A., di ta envolvi cu hayamento di tereno di un forma illegal. Den ambos caso no tabatin detencion. Na januari di e aña aki tabatin entrada hudicial na Corsou, pero aki tampoco tabatin detencion. Angela a confirma cu esaki pues tabata e prome detencion di e caso cu a cuminsa for di 2019. No por a bisa si tin mas detencion na caminda. A compronde cu e persona deteni ta relaciona cu comerciante A.