Crisis Team ta pidi politiconan evita bishita cas pa cas pa core campaña

ORANJESTAD – Core campaña electoral e biaha aki ta bay ta diferente. Por lo menos esey ta e intencion. Si ta pa Crisis Team, politiconan no por bay cas pa cas manera cu e tradicion ta conoci p’e. Tur esaki debi na e pandemia y usando Corsou como ehempel, por mira con si no cuida, e situacion por bay for di man. Cu e situacion actual, manera ya anuncia, e reglanan cu ta vigente pa e proximo dos siman, ta prohibi bishita ‘no familiar’ na cas. Mes momento a bisa cu ta conciente cu no por pone polis na cada cas pa controla, pero gobierno y Crisis Team ta spera cu por conta cu e disciplina civico. 

CAS PA CAS

Ta conoci cu ya tin algun politico cu ta bayendo cas pa cas, y ta pone potret riba facebook di e bishitanan aki y cu esaki no ta corecto y ta wordo descurasha. A splica e portal aki tambe cu no ta e intencion cu ta bay tras di e politiconan aki y ta spera cu nan cumpli y comporta nan mes.  momento, a confirma tambe si cu cada cas ta un lugar sagrado y ta depende di e doño di cas ken e ta laga drenta su cas. Pero ta considera cu no por laga politiconan bishita cas e biaha aki. Segun miembro di Crisis Team Sharline Koolman, mester bira mas creativo pa logra e tipo di interaccion aki e biaha aki. 

Durante e conferencia di prensa diabiera mainta, Prome Minister Evelyn Wever-Croes a elabora riba e topico di campaña electoral den cuadro di e crisis. Como lider di e crisis team, Prome Minister a haci un apelacion na Partidonan politico, politiconan y pueblo di Aruba en general, pa hunto nos evita loke a pasa na Corsou. Reglanan pa Campaña electoral ta esencial pa evita plamamento di e virus.  “Na Corsou nos a mira cu nan a drenta temporada electoral sin tuma cuenta cu e medidanan di precaucion. Manera nos por mira riba e grafico inclui, Corsou a cuminsa na unda a nos tabata. Na unda Aruba ta awor, Corsou tambe a cuminsa pero depsues el a sali for di man y aworaki nan ta riba 4 mil caso. Como Minister President y lider di crisis team, mi ta haci un apelacion na tur ciudadano di nos pais, especialmente nos politiconan, no ban benta afor loke e pueblo di Aruba a sacrifica pe un aña largo. Djies corda kico abo mes a sacrifica, cuanto dia bo no por a bishita bo mayornan, cuanto di nos a manda yiu studia na Hulanda y ora a cera frontera nos no tabata sa ki dia por waknan, cuanto bo a sacrifica cu bo no por a topa cu bo amigonan, bo no por a haci bo deporte. Nos tur a sacrifica hopi den e aña aki. No ban benta esey afor djies pasobra nos ta den campaña electoral”. 

REGLA

Prome Minsiter a duna di conoce cu Korps chef hunto cu DVG a reuni cu e partidonan politico pa splica tambe e importancia pa atende na e reglanan. 

“E reglanan a wordo comunica tambe. Toque de Queda ta keda na 10 pm, Orario di cierre na 9 pm, gebiedsverbod, kiermeen depsues di 7 pm bo no por ta riba parkiglot ta combersa of riba beach, samenscholings verbod ta keda na 2 perosona maximo. Bishitanan na cas no ta permiti solamente si ta famia pasobra nos kier pa famianan sigui bishita otro. Bishita di cuido ta continua y bishta di dokter ta wordo permiti. 

A keda palabra entre DVG, Cuerpo policial y e partidonan politico, cu e partidonan politico lo tuma tempo pa wak ki tipo di actividad nan lo kier organisa y trece bek pa cuerpo policial evalua si ta algo cu por of no por. 

E reunion a bay bon y e mensahe a yega. Aruba ta den un momento hopi critic aworaki. Nos plan di vacunacion por pone cu pa Juni, Aruba ta vacuna. Nos no mester un spike aworakinan pa strobe cu e plan di vacunacion pa Juni aworaki.