Encuesta: Crisis Team mester actua mas severo cu multa

ORANJESTAD – Segun e ultimo encuesta di noticicla, mayoria ta pensa cu Crisis Team mester actua mas severo cu dunamento di multa, por mantene e Toque de Queda na 10’or y cu e vacuna ta algo positivo. Di otro banda, Crisis Team  a demostra di por tuma decisionnan obhetivo cu bienestar general na pecho. Mayoria di e casi 700 persona cu a participa na e encuesta electronico tabata di edad entre 45 y 54 aña di edad, y entre tur esnan cu a participa, los di edad den cantidad di homber y muher , esaki tabata casi igual (homber 50.30%, muher 49.24%). Manera semper, noticiacla ta conciente cu esaki ta un encuesta entre su usuarionan, y no ta uno cientifico y no necesariamente ta representacion di e isla completo. Si, e ta duna un indicacion entre e usuarionan di e portal aki, kico ta pensa di e Crisis Team y e maneho di Gobierno di e pandemia. 

CRISIS TEAM Y GOBIERNO

Tanto gobierno como Crisis Team a sali bon di e encuesta. Mayoria di esnan encuesta, (37%) ta haya cu Gobierno ta haci su miho esfuerso y tin interes general suficiente na pecho, mientras cu 24% ta haya cu Gobierno tin miedo pa tuma medidanan mas stringente. Pa loke ta Crisis Team, 39% ta bisa cu e team a demostra di por tuma decisionnan obhetivo cu bienestar general na pecho y 36% ta haya cu e team ta haciendo un bon trabou den un crisis sin precedente. Un 30% ta haya cu e team su forma di maneho intransparente ta haci’e dificil pa obedece sin mas y 29% ta haya cu e team a faya demasiado biaha y mester wordo reemplaza.

TOQUE DE QUEDA

E medida mas severo cu Aruba a conoce desde cu Aruba ta den pandemia aki, ta e Toque de Queda. Esaki a wordo ahusta varios biaha y te hasta kita ora cu cos a drecha dado momento aña pasa. Pero recientemente a bolbe implementa esaki aunke di un forma mas ‘suave’ esta di mei anochi pa 5’or di marduga. Pero ora cu cos a bay malo atrobe recientemente, a hala esaki bek mas tempran pa 10’or di anochi. Segun e encuesta aki, mayoria di esnan cu a contesta e pregunta aki, (40%) ta haya cu e Toque de Queda cuminsa 10’or ta bon y por lague eynan. Pero 27% ta haya cu mester pone te hasta mas tempran y 14% ta haya cu mester elimina e medida aki completo. Y un 20% ta haya cu mester pone bek pa 12’or mei anochi. 

LEY SECO

Un medida cu no a keda aplica completamente ta ley seco ya cu e ta un medida severo mescos cu Toque de Queda. Entre esnan cu a participa y contesta e pregunta aki, 37% ta haya cu introduccion di ley seco no ta yuda si ningun hende ta tene nan mes toch na e medidanan. Un otro 25% ta haya cu manera cu e ta aworaki unda cu por bebe solamente na bo cas, ta suficiente. Pero tin un 20% cu kier pa implementa e ley seco completo pa algun siman y wak e resultado. Y tin un 18% cu ta bisa cu mester bende alcohol solamente na hotelnan pa posiblemente no stroba e industria turistico. 

MEDIDANAN (MULTA) PA VIOLA REGLA

Manera ta conoci tambe, a implementa multa pa esnan cu no cumpli cu e reglanan, manera TDQ, of otro tipo di reglanan na vigor. Aki tambe mayoria encuesta (34%) ta hay’e un medida efectivo, pero no ta haya cu ta aplik’e suficiente. Pues mester duna mas multa pa e tin mas efecto. Un otro grupo (28%) ta haya cu mester aumenta e multa, siendo cu tin un otro grupo (20%) ta haya cu e multa ta perhudica hende sin entrada innecesariamente. Y un otro grupo ta haya cu mester laga e multa manera cu e ta. 

MEDIDANAN IMPONE

Pa loke ta e medidanan cu Crisis Team y gobierno a impone, mayoria ta haya nan bon, aunke 46% ta haya cu no tin control suficiente. Nan ta sugeri pa introduci un task force cu ta controla y meld na polis pa por actua mas ora di infraccion. Un otro 23% ta haya cu e crisisteam ta evalua bon hunto cu RIVM pa tene un balance entre medida necesario y e derechonan fundamental di nos pueblo. Un otro grupo (17%) ta haya cu nan no ta traha. Nan ta haya cu mester acepta cu Covid a bin pa keda, habri tur cos normal mesora y segun mester amplia capacidad di ICU. Y un otro grupo (15%) ta haya cu loke tin ta bon, pero mester di mas medida, manera ley seco, shelter in place, toque de queda mas largo etc.VACUNA

Tambe a puntra un biaha mas riba e pensamento di vacuna. Aki e gran mayoria (49%) di esnan cu a contesta e pregunta aki ta haya cu e ta yuda y e programa di vacunacion aproba pa Hulanda ta adecua. Tambe tin un grupo (36%) ta haya cu mester introduci un paspoort pa tur esnan cu a vacuna por tin mas libertad di movecion na Aruba mes. Un grupo mas chikito, (16%) ta haya cu e vacuna mes no ta adecua. Mester un miho alternativa di tratamento. Y finalmente, un otro grupo, (14%) Mester bin cu otro vacuna (p.e. Johnson &Johnson) pasobra mi no ta confia esun mRNA den dje. 

CRISIS TEAM DURADERO

E Crisis Team actual ta pa un termino di e crisis aki. Pero pensando pa futuro, a puntra kico ta pensa si structura esaki di un miho forma unda cu e crisis por dura p.e mas cu un aña. Mayoria cu a contesta e pregunta aki, 57%, a bisa cu e structura ta bon pasobra den crisis no mester tin hopi discusion pero mester actua di biaha. Un otro grupo (27%) ta pensa cu nan no tin afinidad cu henter comunidad y p’esey no ta representa tur gremio. Y tin tambe un otro grupo, (25%) cu  ta haya cu nan ta funciona den un structura di calamidad pa guia e país algun dia, sin control di Parlamento, cu no ta adecua pa un crisis cu ta dura asina largo. Y finalmente, 16% ta haya cu nan no ta lidernan escohi pa pueblo e p’esey ta carece di e confiansa necesario pa medidanan di impacto grandi pa e pueblo.