Wever: E variante Britanico ta causa 80% di contagio na Aruba

ORANJESTAD – E variante Britanico di e virus di Covid19 a bira esun dominante riba Aruba cu 80% di contagio procedente di e variante ey. Asina prome minister di Aruba a bisa den e programa nobo Tanchi Eve diaranson anochi y a bolbe ripiti esaki diahuebs mainta riba su pagina di Facebook. Segun e rapport di e siman aki di RIVM di Hulanda, nan ta sostene e punto aki. “ Na Aruba, Bonaire y Corsou, tin un aumento di circulacion di variante visible, cu mas sigur ta e forza tras di e aumento fuerte den e cantidad di casonan” RIVM ta bisa e siman aki. 

AUMENTO A DOBLE DEN UN LUNA

Segun e mandatario, den apenas un luna, e variante a bay di 40% pa 80% responsabel pa e contagio local. Asina mes e ta 5% menos cu Corsou, unda cu e isla ta entre 95% pa 100% responsabel pa e contagio. E informacion nobo pa Aruba ta splica segun Wever, e aumento di caso y e hecho cu e casonan no kier baha. 

MENOS HENDE TA TEST

Ademas e mandatario a confirma cu ta mustra cu e problema acerca ta cu hende no kier test, of si nan test mes, nan ta test mucho laat, despues di 4 dia cu nan tin e virus caba, cu ta pone cu nan a contagia cantidad di hende caba. 

RIVM

Segun RIVM, e grupo di persona di edad 45 pa 64 ta unda cu e casonan nobo di contagio ta mas halto. Mientras cu no ta raporta un update di variantenan, ta bisa cu te cu awor tin 114 caso positivo di e variante Britanico, 3 di Brazil, 2 di Sur Africa y 8 di California.