Wever: Rapport ta mustra un mismanagement total den RdA

ORANJESTAD - Tabata tin un mismanagement total den Refineria di Aruba (RdA), hopi miyon florin a wordo gasta den dos aña, sin cu Aruba ni RdA a haya nada tangible di dje. Asina e prome impresion di Prome Minister y alavez minister di Energia Evelyn Wever Croes tabata riba e rapport cu el a ricibi diahuebs mainta riba e investigacion riba e.o. actual parlamentario Richard Arends su envolvimento den Rda. E rapport a keda entrega na e mandatario awe mainta y esaki tabata e prome reaccion. E rapport ainda no ta publico y ta wordo presenta proximamente na Parlamento. 

DISGUSTING

“Mi a cuminsa lesa e rapport, sinceramente mi mester a pone un banda. E ta ‘disgusting’, pa mira con algun hende a gasta placa, sin duna cuenta, sin descaro” e mandatario a sigui bisa. “ Mi a pone e rapport un banda, pa sigi cu e reunionnan di awe, y mas anochi lo mi sigi lesa, y prepara pa bai Parlamento” e mandatario a continua bisando. “Gobierno a faya. No ami como minister encarga cu energia, e minister anterior, pero toch e rapport ta refleha malo riba Gobierno en general cu ta accionista den e compania y a permiti e deroche di placa aki”. Segun e mandatario, desde cu el a bira minister el a pone integridad ‘front and center’ di nan maneho. “Mi a insisti pa RdA investiga kiko a bai fout desde cu e compania a wordo funda na 2016. E investigacion a tarda, mi mes por a wak e rol importante cu parlamentario Richard Arends a hunga den e tardansa aki, pero awor si e ta cla. Y awor mester tuma accion. Aruba merese mihor, y ami sigur kier brinda Aruba esey” e mandatario a finalisa bisando. 

RICHARD ARENDS

E rapport a wordo traha basa riba e hecho cu segun informacion ricibi, actual Parlamentario Richard Arends lo a haya un trabou lucrativo eynan, como un director di posicion halto, siendo cu esaki no tabata possible. Basa riba tanto incertidumbre riba su rol den e compania, siendo un minister e tempo ey (gabinete anterior), a trece hopi pregunta cu e gabinete actual kier a haya clarifica.