AZV kier hiba asosacion di dokternan di cas corte

AZV kier hiba asosacion di dokternan di cas corte

Posted on 04/5/2021 7:23 pm AST | Updated on 04/5/2021 7:25 pm AST

ORANJESTAD - Organo Ehecutivo(OE) AZV a informa dialuna atardi laat cu nan a haci nan maximo esfuerso pa convence dokternan di cas pa bou di e circunstancianan dificil cu nos pais y e fondo di AZV ta pasando aden pa no aplica e medida di un ora menos di servicio pa nos aseguradonan. Lamentablemente segun AZV, e ultimo carta dia 5 di april di e Asociacion di Dokternan Di Cas (HAVA) ta mustra cu dokternan di cas no tin comprension pa e situacion. Por lo tanto OE AZV ta contemplando pa aplica e clausula di boet cu tin den e acuerdo entre dokternan di cas y ta contemplando pa acerca corte riba e impase entre dokternan di cas y OE AZV. 

SITUACION DIFICIL PA TUR

E pandemia di coronavirus a causa un situacion sumamente dificil pa tur hende riba Aruba y tambe pa OE AZV. E pandemia a resulta den efectonan negativo grandi riba salario di e gran mayoria di e forsa laboral di Aruba, poniendo tambe cu e entradanan di e fondo di AZV a cay drasticamente resultando den un aumento di e contribucion di Pais Aruba den e fondo. Pais Aruba den su afan pa garantisa cu e por cumpli cu su obligacionnan na entre otro e fondo di AZV a yega na un acuerdo cu Hulanda. Parti di e acuerdonan ta cu mensualmente lo mester reduci e gastonan di AZV cu un promedio di 5 miyon florin. Basa riba e palabracion aki AZV a ricibi un instruccion pa retene 5,5% di e tarifa- y presupuestonan di e dunadonan di cuido. 

APLICACION 5,5%

Desde 1 di juli 2020 AZV ta aplicando e 5,5% riba e tarifa di abonnement di e dokternan di cas. Pa februari, maart y april AZV a ricibi instruccion pa aplica 2,2%. Den lus di e retencion aki Organo Ehecutivo AZV a keda sorprendi pa e carta di dia 23 di februari 2021 di e Asociacion di Dokternan Di Cas di Aruba (HAVA) caminda nan ta menasa AZV cu si no cumpli cu nan exigencia di adaptacion di e tarifa di abonnement entrante 1 di maart 2021, dokternan di cas lo cuminsa traha 1 ora menos entrante 1 di maart 2021. E exigencia di HAVA ta basicamente un aumento di un 15% di e tarifa. 

PETICION NO REALISTICO

Dia 26 di februari OE AZV ta informa HAVA cu cumplimento cu nan exigencianan na e momento aki no ta realistico. Esaki en bista di e acuerdo entre Aruba y Hulanda pa loke ta reduccion di gastonan. Dia 1 di april HAVA ta reacciona mediante su abogado y ta cuestiona e legalidad di e retencion di 5,5% y ta indica cu si no yega na un acuerdo cu e dokternan di cas, entrante 1 di april e dokternan di cas lo cuminsa duna un ora menos di servicio na e aseguradonan di AZV. 

SENTENCIA DEN CASO WEB NV

OE AZV a warda e sentencia den e caso di trahadornan di WEB NV y e compania. Dia 22 di maart OE AZV ta reacciona mediante su abogado y ta mustra basa riba entre otro e sentencia cu e retencion ta den cuadro di ley. Un biaha mas OE AZV ta subraya e importancia di cumplimento cu e condicionnan mara na e sosten di likides pa garantisa cu AZV por cumpli cu pagonan di e dunadonan di cuido. Ademas a mustra cu e situacion economico di Aruba ta impone su retonan financiero riba e fondo di AZV y un aumento di tarifa pa dokternan di cas no ta posibel tanten e situacion permanece asina.

ANUNCIO 1 DI APRIL DI HAVA

Dia 1 di april OE AZV ta tuma nota di a anuncio publico di HAVA cu entrante e fecha ey dokternan di cas ta duna un ora menos di servicio na e aseguradonan di AZV. Mediante abogado, OE AZV ta informa HAVA cu OE AZV no ta acepta e un ora menos di servicio pa su aseguradonan y ta anuncia cu lo aplica e sancionnan cu tin den e acuerdo cu e dokternan di cas y ademas no ta exclui cu lo cuminsa un kort geding. 

REACCION DI HAVA

Dia 5 di april e abogado di HAVA ta reacciona sin ta recapacita manteniendo e exigencia di aumento di tarifa y cuestionando e legalidad di e retencion. Mester subraya cu OE AZV ta reconoce e contribucion grandi cu e dokternan di cas a bin ta dunando den e pandemia. OE AZV a trata na duna un compensacion extra tambe pa e esfuersonan aki te con leu e situacion financiero a permiti. Pero tambe OE AZV mester keda responsabel den su maneho y garantisa bou e circunstancianan actual cu e fondo di AZV por keda ricibi e sosten di likides manera palabra entre Aruba y Hulanda. 

KICO POR SOSODE SIN SOSTEN DI HULANDA? 

Sin e sosten aki por yega e momento cu e fondo no por paga. Despues di evalua e interes di nos aseguradonan, e interes di e fondo y e interes di Pais Aruba, OE AZV ta keda para ariba cu no ta acepta e un ora menos di servicio pa su aseguradonan. 

Mas aun awor cu den cuadro di solidaridad cu nos isla ruman Curaçao, dokter Horacio Oduber Hospital a cuminsa duna un man, no por acepta menos ora di servicio. Mas aleu, si considera cu e retencion di 5,5% pa dokternan di cas ta representa un promedio di 1.900 florin pa luna menos na entrada, ta dificil pa comprende cu no por ta solidario cu e comunidad pa e suma aki. OE AZV ta keda habri semper pa dialoga y habri pa cuminsa traha pa e periodo post Covid. OE AZV lo keda informa su aseguradonan di e desaroyonan riba e tereno aki. 

  • Casonan positivo ta bahando pero positivity rate ta hopi halto

     Casonan positivo ta bahando pero positivity rate ta hopi halto

    ORANJESTAD - Segun resumen di awe  , a registra un total di 21 caso nobo di Covid-19, di cual 2 ta no-residente. E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 460 test. 'Postivity rate' entre nos residentenan ta 37% y 81 persona a recupera.

  • Minister demisionario di Corsou personalmente a gradici Aruba pa ayudo

    Minister demisionario di Corsou personalmente a gradici Aruba pa ayudo

    ORANJESTAD – Manera ta conoci, Aruba a habri porta pa yuda Corsou cu e fluho di pashentnan di Covid19 debi na e situacion cu a surgi na e isla ruman cu un cantidad explosive di pashent. Diabierna Hospital a ser sorprendi pa Minister demisionario di Enseñansa, Cultura, Ciencia y Cultura di nos isla ruman Corsou, esta Minister Steven Croes. E ta actualmente di bishita na Aruba pa motibonan personal y tabata desea di pasa y gradici personalmente Dr. Horacio E. Oduber Hospital y specialmente e personal cu ta trahando incansablemente pa asina brinda un man na pashent di Covid-19 di Corsou. E ayudo aki di Aruba na islanan ruman den reino Hulandes a demonstra cu trahando hunto pa bienestar di pashent, crece so nos lo sigui crece riba diferente nivel. 

  • Cruz Cora Aruba ta stop cu e programa di ayudo di cuminda

    Cruz Cora Aruba ta stop cu e programa di ayudo di cuminda

    ORANJESTAD ? Despues di mas cu 12 luna yudando cu e programa di cuminda na esnan mas vulnerabel den nos comunidad, Cruz Cora Aruba ta preparando pa e final di e programa. For di mei 2020, Cruz Cora a coordina e programa aki na momento cu a wak e necesidad grandi cu a surgi durante e pandemia. 

  • WEB y ELMAR ta anuncia ‘posibel’ interupcionnan cortico di coriente proximamente

    WEB y ELMAR ta anuncia ‘posibel’ interupcionnan cortico di coriente proximamente

    ORANJESTAD –  Operacion di e planta di energia di WEB Aruba te ainda pa gran parti ta rekeri monitoreo y ahuste continuo den forma manual door di operadornan. Pronto lo trece cambio den esaki cu un sistema cu yama ‘Intelligent Generation Management System’ (IGMS). Durante e proximo 4 simannan, WEB lo integra tur su unidadnan di produccion di coriente y energia den e sistema IGMS. Di e forma aki lo regula e suministro di coriente automaticamente. Durante e proceso, clientenan lo por experencia interupcion di coriente corto cu un average entre 15 pa 30 minuut. Ta tuma tur precaucion debido y ta alinea pa minimalisa e interupcion aki. Hunto cu IGMS lo implementa e sistema Intelligent Load Shedding (ILS) den cooperacion cu ELMAR. E ‘load shedding’ ta pa evita cualke interupcion grandi di coriente. Asina clientenan den futuro lo por ripara interupcion na un escala menos grandi y di poco duracion. Lo mantene pueblo semanalmente informa di e proceso di implementacion via pagina di Facebook di WEB y di ELMAR. 

  • SKOA ta refuta acusacionnan infunda di Minister Rudy Lampe

    SKOA ta refuta acusacionnan infunda di Minister Rudy Lampe

    ORANJESTAD – Stichting Katholiek Onderwijs Aruba (SKOA) SKOA ta refuta acusacionnan infunda di Minister Rudy Lampe. Asina e fundacion a bisa dialuna den un conferencia di prensa. Su director Anuesca Baly a refuta energicamente e acusacionnan cu nan ta considera sin base cu minister demisionario di Enseñansa Rudy Lampe a haci den conferencia di su partido dia 6 y 13 di april ultimo. Na e ocacion ey segun SKOA, minister Lampe a acusa SKOA di ta comete actonan ilegal den maneho di personal, di inhabilidad pa cumpli cu debernan di afdracht y di a instiga maestronan di scol pa demonstra contra e mandatario.

  • Crisis Team: Aruba preparando pa tene un vacunathon

    Crisis Team: Aruba preparando pa tene un vacunathon

    ORANJESTAD – Dentro di poco dia, Aruba lo tene su prome vacunathon. E meta ta pa den dos dia, logra vacuna 10 mil persona contra Covid19.  Diabierna dia 16 di april, Aruba a ricibi bishita di un delegacio di Hulanda esta e gezant vaccinatie y e beveiligingscoordinator cu a bin Aruba pa tuma nota di e proseso completo di e programma di vacunacion na Aruba. 

  • Powered by SETAR