Conoce e dos noticianan ‘falso’ di Noticiacla pa April Fools day

ORANJESTAD – Cu excepcion di aña pasa, tur aña riba 1 di April, conoci como April Fools Day, e portal aki ta probecha y lansa algun noticia ‘falso’ como tradicion. E ta e dia conoci mundial mente como e dia di ‘mentira’. Y siendo un portal serio cu tin como lema, noticia cu bo por confia, esaki ta e unico dia cu por haci wega. Aña pasa mirando e situacion di pandemia den un estado hopi curu y critico, a mira cu no tabata responsabel pa bin cu jokesnan e momento ey. E aña aki, cos tabata diferente y a dicidi pa pone dos noticia ‘mentira’. Pero for di e reaccion, por a nota cu hopi, si no ta mayoria, no a cay ariba cu e noticianan tabata ‘falso’. 

NOTICIA FALSO #1

E prome noticia falso tabata esun cu tabatin dos partido politico cu tabata cla pa lansa nan mes e siman entrante. Uno dedica riba e proteccion di bestia y e otro riba e emancipacion di hende muher. A pensa cu e ta un tema actual, y mirando cu rond mundo tin partidonan tematico, a haci esaki como un posibilidad real. Pero, e tabata un mentira e biaha aki. 

NOTICIA FALSO #2

E di dos noticia falso, tabata esun cu gobierno tabata pensando pa introduci votacion estilo drive thru. E ta un idea noble cu ya a ser usa na varios pais, incluyendo Hulanda recientemente. Entre nan, ta duna e facilidad pa e persona keda den su auto y sin baha di su auto, deposita su voto electoral. Mirando e situacion di e pandemia, Hulanda a haci esaki e aña aki. Aruba tambe ta gara pa e pandemia y como tal e forma cu a traha e noticia, e no a mustra nada malo y hopi a cay pa e noticia aki. Varios a bisa cu nan ta conciente cu e por ta un noticia falso, pero asina mes e no ta un mal idea pa bin cu esaki.