Poundwise satisfecho cu acuerdo entre piscadonan y Stichting Rancho

Poundwise satisfecho cu acuerdo entre piscadonan y Stichting Rancho

Posted on 04/3/2021 5:30 pm AST | Updated on 04/3/2021 5:32 pm AST

ORANJESTAD - Despues di algun siman di negocacion, finalmente, e desaroyadoran di e proyecto di condominium Harbour House & Boardwalk, esta  Poundwise Investment & Developments , piscadonan di Waf'i Rancho, Stichting Rancho y Aruba Ports Authority a yega na otro pa cu e proyecto di embeyecimento alrededor di Paardenbaai. Asina e propetario y desayorador, Sr. Alberto Perret Gentil a informa e siman aki. El a bisa di ta sumamente contento di e logro aki; "Poundwise ta contento y satisfecho cu por a yega na un acuerdo unda cu tur partido ta sali beneficioso". E asunto principal di parkeo a keda resolvi como tambe tin bon entendimento encuanto acceso y uzo rond di e pier. Tur piscado lo tin acceso cu vehiculo pa e pier pa 'load' y 'unload'. E promenade di Harbourwalk lo ta pa uzo peatonal cu excepcion di e vehiculonan di piscadonan. Adicionalmente Poundwise lo construi un facilidad di baño, deposito y lo duna uzo di awa y coriente na e piscadonan. Tambe lo construi un 'pergola' unda piscadonan por corta pisca.

Beneficionan di Proyecto.

E PROYECTO

E proyecto di Harbour House y Harbourwalk ta un proyecto di condominio cu mas di 110 apartamento, y localidadnan disponibel di huur pa restaurants, cafe's, icecream parlor, minimarket, y hopi mas. Harbour House y Harbourwalk segun e desaroyador, lo genera mas di 100 cupo di trabou directo y hopi mas cupo indirecto pa nos mercado laboral. Tambe nan ta sigura cu e lo contribui grandemente na entrada di Gobierno. Pa converti e area aki uno atractivo y 'safe' pa comunidad y turista, desayoradornan a propone un Proyecto di Embeyecimento pa e area di Paardenbaai cu ta cuadra cu e vision di Revitalisacion di Oranjestad. Cu e proyecto aki Poundwise ta spera di por revitalisa e area di Weststraat, cu tin mas di 17 aña bandona. Ta spera cu pronto comercio den e area aki por crece den fluho di consumidor y entrada.  

REPOSICIONA AREA DI WEST STRAAT

Segun e compania, e meta di Poundwise semper tabata y ta, pa re-posiciona e area di Weststraat, manteniendo su historia y balor cultural. Despues di a logra un otro acuerdo mutuo, tur stakeholders por traha pa un area mas resiliente,  di mayor atraccion den Oranjestad, safe, limpi y bunita. Nan ta sigui bisa cu pa final di 2021 Aruba por conta cu un area di nivel internacional pa nos turista, specialmente pa e industria di crucero, como cu ta na e dicho area aki tur turista di crucero ta drenta Aruba. Poundwise y Pering Group ta gradici Sr. Marc Figaroa di Aruba Ports Authority, cu a fungi un rol fundamental pa tur stakeholders. Sr. Perret Gentil ta subraya cu e negocacionnan cu e representantenan di Piscadonan y Stichting Rancho a bay sumamente bon y cu hopi respet mutuo y ta gradici nan pa nan dedicacion y contribucion. Poundwise ta spera cu esaki ta un comienso di un aliansa, amistad y cooperacion mutuo na bienestar di Paardenbaai y Aruba en general. 

KEN TA POUNDWISE INVESTMENT

Poundwise Investment & Developments y Pering Group ta un compania estableci na Aruba, cu un trayectoria impecabel cu mas di 70 aña di experienca internacional den su industria. Cu mas di 20 aña estableci na Aruba, e grupo Perret a inverti den desaroyo di Oceania, Blue Aruba y Azure Residences, atraendo e bishitante di balor halto cu ta apoya e crecimento di balor economico di nos industria di Turismo y creando centenares di cupo di trabou. Na aña 2017 Poundwise a cumpra na un findishi e edificio di condominio situa na Weststaat, ex- Marazul cu awor ta Harbour House. Poundwise ta contento y orguyoso di por aporta na revitalisacion di Downtown Oranjestad, como tambe na reactivacion economico di Turismo di Aruba.

  • Powered by SETAR